Atassutikkormiut Demokraatinut nuuttut
Atassut sinnerlugu Narsap kommunalbestyrelsiani ilaasortaasimasut Demokraatit immikkoortortaannik pilersitsipput.
Torben Emil Lynge, Narsami borgmesteriusimasoq Atassummilu ataqqinaammik ilaasortaq aamma Orla Rødgaard, Atassut sinnerlugu kommunalbestyrelsemi ilaasortaasimasoq Narsami Demokraatit immikkoortortaqarfiannik pilersitsinissamut siuttuusimapput.
- Ajoraluartumilli ukiuni kingullerni takusinnaasimavara partii ilaasortaaffigisimasara talerpilliunerusumik liberaliusumillu isummat qimakkaluttuinnarsimagai. Tamanna pissutigalugu qinersinnaasakka tassaalersimapput politikkimit tunuarluinnarnissara imaluunniit Kalaallit Nunaanni partiimut kisiartaasumut liberaliuvissumut ilaasortanngussallunga – Demokraatinut. Kingulleq toqqarsimavara,” Torben Emil Lynge 1983-imiit 1989-imut Atassut sinnerlugu Inatsisartuni ilaasortaasimasoq oqarpoq.
Atassummit tunuartut pillugit Atassutip siulittaasua Finn Karlsen oqarpoq Atassut politikkiminik allanngortitsisimanngitsoq.
- Inuiaqatigiit ajunnginnerpaamik atugassaqartitaallutik ineriartorsinnaanissaat qulakkeerniarlugu Atassummit aalajangersimavarput akisussaaffimmik tigusiniarluta, tassa Siumumik naalakkersuinikkut suleqatiginninniarluta, tamannali imatut isumaqanngilaq Atassutip politikkikkut anguniakkani qimassimagai, paarlattuanilli akisussaaffimmik tigusineruvoq anguniakkat tunngavigalugit sapinngisamik annerpaamik ingerlasoqarsinnaanissaa isumannaarniarparput, Finn Karlsen oqarpoq.