Angalaniarnermi ajornartorsiutit qatsuppaat
Qaanaap Kommunia angalaniarnermi ajornartorsiutit qaangernissaannut aaqqiissutissamik nassaarniarluni ataatsimiigiaqqusivoq.
Kommuni, suliffeqarfiit takornariaqarnermillu inuussutissarsiutillit ataatsimoorlutik politikerinut akisussaasunut saaffiginninnialerput, pissutsit taamatut ingerlaannarsinnaanngimmata, kommunadirektør Poul Alex Jensen oqarpoq.
- Mittarfik sumulluunniit iluaqutaananilu asuli aningaasartuutaannaavoq, illoqarfimmi hotelituamik piginnittuullunilu illoqarfimmi takornarianut allaffimik ingerlatsisuusoq Hans Jensen oqarpoq.
Isumaqarpoq Qaannaaq takornariarfissatut piukkunnarluinnartuugaluartoq.
- Naak Air Greenland aasaanerani sapaatip akunneranut marloriarluni maanga timmisartoqartitsisaraluartoq taamaattoq maanga angalaniarnerup akisunerujussua ajornartorsiutaasarpoq, aammami timmisartup Qaanaaliartussap aamma Qaarsuasukkooqqaartarnera Upernavikkooqqaartarneralu pissutaalluni inissat tamakkerneqareersimagajuttarput.