Tuttorpassuit unioqqutitsisumik pisaapput
Namminersornerullutik Oqartussat isumaliutigaat Ivittuut kommuneani tuttunniarneq inerteqqutaalluinnalissasoq unioqqutitsisumik tuttunniaqarpallaarnera pissutigalugu.
– Tuttunniarnerup 1. august 2007 aallartinneraniilli Ivittuuni Piniarnermut Aalisarnermullu Nakkutilliisup Ivittuut Kommuniani tuttunniarfigeqqusaasoq misissortuartarsimavaa. Misissuinerisalu takutippaat, piniarfigeqqusaasup avataani pisarineqartartut amerlasoorujussuusut, taama tusagassiutinut nalunaaruteqarpoq Namminersornerullutik Oqartussat avatangiisinut pinngortitamullu pisortaqarfiat.
Taqqavani piniarnermut nakkutilliisoq ilisimatinneqarsimavoq Ivittuut kommuneani unioqqutitsisumik tuttunniartoqartoq. Namminerlu takuniaarnermi naammattoorsimavai tuttunniarfigeqqusaasumi taassumalu avataani tuttut aallaariarlugit qimagaannakkat.
– Pisortaqarfimmit sakkortuumik inassutigissavarput nunap immikkoortuata 11-ip avataani unioqqutitsilluni tuttunniarneq piaarnerpaamik unitseqqullugu. Nunap immikkoortuata 11-ip avataani unioqqutitsilluni tuttunniarneq ingerlaannassappat, pisortaqarfiup isumaliutigissavaa nunap immikkoortuani 11-mi piniarnerup unitsinneqarsinnaaneranik aqqutissiuussinissat tullinnguuttariaqarnersut, taama avatangiisinut pinngortitamullu pisortaqarfik tusagassiutinut nalunaarpoq.