Qernertaq marlunnik tuugaalik
Piniartoq Mads Ole Kristiansen ippassaq Qaanaap eqqaani qaqutigoortumik pisaqarpoq qilalugaq qernertaq marlunnik tuugaalik naalikkamiuk.
Inughuit avanersuarmi piniariaasitoqaq malillugu suli qilalugarniartarput tassa qilalugaq qaannamiit naaleqqaarneqartarmat piniagarsuaq taanna annaajumanagu. Piniartorlu Mads Ole Kristiansen ippassaq Qeqertanut tulakkiarpoq qaqutigoortumik pisaqarsimasorsuulluni Aleqatsiaq Peary kajaqatigalugu qernertaq marlunnik tuugaalik pisarigamikku - taamaattumik qaqutigorsuaannaq pisaqartoqartarpoq.
– Qilalukkat arfineq marluk ornippavut qaninnerillu ilaat naaleriarakku avatara "iserpoq" (morsuppoq). Kiisami puttallaqqeriallartoq qilalugarujussuarmik ilaqarluni misissuleriaratsigulu paasilerparput marlunnik tuugaalissuaq, taama Mads Ole Kristiansen pisarsuani pillugu oqaluasaarpoq.
Tuugaavat aappaa 206 centimeterinik takissuseqarpoq aappaa 185 centimeterinik takissuseqarluni. Mattatsiarlu pisarsuup taassuma nassataa uagut sinnatoriinnarsinnaavarput. Nerilluarisi.