Alluitsumi iluarsaassineq imaannaanngitsoq

Qaqortumi Sulisartut Højskoleata aamma Sisimiuni Sanaartornermut Ilinniarfiup - Bygge-, Anlæg-, og Trækartellet (BAT) aamma RealDania-mit tapiiffigineqarlutik - ukioq manna marsimi lærlingenut suliniut ukiuni pingasuni ingerlasussaq aallartissavaat.

Aningaasaqarnikkut missingersuusiaq 24 millioner kronenik aningaasartalik inissereerpoq, Sulisartut Højskolianni pisortaq Kaj Lyberth KNR-imut ilisimatitsivoq.

Qalipaasut kattuffiata aviisianit »Maleren«-imit ataani issuagaq pissarsiarisimavarput:

»Realdaniap aningaasaateqarfiata, Namminersornerullutik Oqartussat Kalaallit Nunaanni Sulisartut Kattuffiata sanaartornermillu ingerlatallit arlallit aningaasaateqarfiisa - BAT-kartellip suliniuteqarneratigut - sulimiummut tapersersuinissartik aalajangiusimassappassukamigartooruteqarsinnaanermut 2,1 millioner kronenik qularnaveeqqusiinissaq tapersersorlugu ajoqersuiartortitaqarfitoqaq iluarsaanneqarsinnaalissaaq.

- Iluarsaassinissamut pilersaarutip immikkuullarissutigaa suliffeqarfinnit ingerlatassanngorlugu atuartitsissutitut lærlinginit suliarineqartussanngussagami, kattuffimmi allattuuneq Søren Kjærsgaard oqaluttuarpoq. Lærlingit Danmarkimeersut Kalaallit Nunaanneersullu ataatsimoortinneqassaput, - taamalu tamarmik immikkut kulturitik aallaavigalugit - imminnut naapillutik iluarsaassinissamik suliassaq naammassiniassallugu, - Rambølimiit ingeniørit nakutilliisoralugit aammalu ilursagassanik titartaasartoq Bygningskultur Danmarkimeersoq siunnersortigalugu.

- Lærlingit illuanik iluarsaassinermut ilinniartissavagut ilisimasanillu lærlinginut kalaallinut ingerlatitseqqiisinnaalissalluta, taakku taamaalillutik kulturikkut illuliornikkullu kingornussatik nakkutigilersinnaassagamikkit, Søren Kjærsgaard paasissutissivoq.

Kisianni ajoqersuiartortitaqarfitoqarsuaq Qaqortumi Sulisartut Højskoliannit aqunneqartumik kalaallit nunaanni kulturikkut, ilinniarfittut ataatsimeersuartarfittullu ingerlaqqissinnaalertinnagu inissinniagassat aaqqeqqaagassat amerlaqaat.

Aallaqqaammut GTO-p illuutaasa nutaanerit marluk nutarteqqaarnissaat pilersaarutaavoq. GTO-p illuutaai tassaapput illut qisunnik sanaat 'Grønlands Tekniske Organisation'-ip kitaata sineriaani nunaqarfinni sanatittarsimasai), taamaaliornikkut lærlingit inissaqarsinnaalissammata.

Illut innaallagialissapput, imermik kissartulerneqarlutik, uffarfilerneqarlutik kuutsittakkamillu perusuersartarfilerlugit, taamaalillutik lærlingit sapaatit akunnerini pingasuni-sisamani Alluitsumi sulinerminni atugarissaarsinnaassammata. Suliassarlu tamarmi naammassereersimaleriarpat GTO-p illutoqai - ajoqersuiartortitaqarfitoqqatulli - kulturikkut ingerlatsivittut, ilinniarfittut ataatsimeersuartarfittullu ingerlatsivimmut ilaalisssapput, aammalu sanaartornermik suliaqartut kattuffiisa aasaanerani ilaasortaminnut neqeroorutitut atorsinnaalissallugit. Kalaallit Nunaanni kommunit kujasinnerpaat pingasuusut Alluitsumi umiarsualiveeraliortitsissapput, innaallagissiuusersuissallutik imeqarfiliorlutillu.

Illuliornermik ingerlatsisut ilinniartitsinermut aningaasaateqarfiisa kalaallillu SIK-at suliniummut aningaasaliinerannut peqqutaavoq, aningaasartuutit siumut takorlooreerneqarsinnaanngitsut pilersaarummik ajoqusiisinnaanissaat pinngortsootiniarlugu, aammalu lærlingit suliffimmi sunngiffimmilu atortussaannik eqqortunik tunisinnaaqqullugit, taamaalillutik lærlingit aamma nuannersumik misigisaqarsinnaaqqullugit, Søren Kjærsgaard nassuiaavoq.

Kisianni millionerpaaluit Realdania-mit Namminersornerusuniillu aningaasaliiffigineqaqqaassapput. Aamma Realdania suliniummut taamaattumut tapiisinnaanerminik neriorsuuteqartinnagu 'Bygninskultur Danmark' Aluitsumi illut tammatsaalineqarnissaannut naleqassusiannik nalilersuisussatut suliakkinneqarsimavoq.

Nalileereerlutillu oqarput, palasip illua, oqaluffik, savaatit inaat nerisassamaatinullu toqqorsivik tammatsaaliugassaqqilluinnartuusut. Meeqqat angerlarsimaffiat nutaanerusoq aamma kulturikut eriagisassamik imaqartoq, aammalu GTO-p iluutai nunaqarfimmut atasut oqaluttuarisaanermut tunngatillugu eriagisassanik imaqartut, taamalu nunaqarfik ataatsimut isigalugu kursuscenteritut takornariarfissatullu ingerlanneqarsinnaasunngorlugu aaqqissuunneqarsinnaasoq.

Tamatuma kingorna suliniutip ataannarsinnaaneranut tunngatillugu misissueqqissaarnerit marluk ingerlanneqarsimapput, Realdania-llu malittarisassani ukioq manna allanngortissimavai, taamaalilluni Danmarkip killeqarfiata avataani suliniutinut aningaasaliisinnaalerluni.«