Skip to main content

Gellerupimi kalaallit qitserarneqartartut

Århus Kommunemit nassuiaammi nutaami uppernarsarneqarpoq kalaallit Gellerupimi inissiaqarfimmiittut ilaat suli malersorneqartut. Malersuinerit appiussuussinerullutillu qitseraanerusarput.

Gellerupimi nukappiaqqanit inuusuttunit kalaallinik appiussuisarnerit qitseraasarnerillu suli pisartut Århus Kommuneaniit nassuiaammi nutaami erserpoq.

Gellerupimi malersuinerit annertuut peqqutigalugit kalaallit ilaqutariit qulit Århusip immikkoortortaanit tassanngaaniit 2007-imi nuussimapput. Kalaallit 35-iniit 40-t tungaanoortut sinneruttut ulluinnarni atukkaminni suli malersorneqartarput.

- Kalaallinut tunngasoq taanna malunnaammut ulorianartumut siammarsimasumullu ersiutit ilaannaraat. Pineqarpoq muslimit inuusuttut qallunaat nunaanni inuiaqatigiit ilaannut akeqqersimaarnermik pissusilersuuteqaleriartornerat, tamannalu tunngaviatigut ajornartorsiutaavoq illuatungeriit tamarmik aaqqinniarlugu suliniutigisassaat, taamak atugarissaarnissamut ministeri Karen Jespersen Kristeligt Dagbladimut oqarpoq.

Århusimi illoqarfiup immikkoortortaani Gellerupimi inuusuttunit eqqissiviilliortunit ajornartorsiortinneqartut kalaaliinnaanngillat.

- Gellerupimi oqaluffik aamma Bazar Vest (Gellerupimi pisiniarfissuaqarfik, aaqqiss.) musliminit inuusuttunit eqqissiviilliortitsiniartunik ajornartorsiuteqartarsimapput, taamaattumik tamaani kulturikkut aaqqissuussaaneq allanngortillugu aaqqinniagassaavoq – tamannalu Århus Kommunep uangalu sulissutigalugu aallartereerparput – ajornartorsiutit tamakku qaangerniassagutsigit, Karen Jespersen Kristeligt Dagbladimut oqarpoq.

Inuusuttut 25-30-it 17-init 22-illu akornanni ukiullit Gellerupimi ajornartorsiortitsisuupput. Eqqissiviilliortitsisut inuusuttutut inuunerminnik ingerlatsilluartutut taaneqarput, inuusuttullu ikittuinnaat atugarliortut arabiamiunit kingoqqisut.

Taakkua saniatigut inuusuttut sakortusaartartut 5-6-it 12-t 15-inillu akornanni ukiullit eqqissiviilliortitsinerit, aserorterinerit sioorasaarisarnerillu annersaannut peqqutaapput, Århusip ilaani Gellerupimi.

Atugarissaarnermut ministerip Karen Jespersenip tamaani kulturikkut ajornartorsiutit akiorniarlugit sukannernerusumik suliniuteqarfiginiarpai. Taamaattumik atugarissaarnermut ministerip aggutsip aallartinnerani kommuni qinnuigisimavaa, 2007-imi pisimasut kingorna nassuiaammik suliaqaqqullugu.

Isumaginninnermut ingerlatsivik isumaqarpoq, ataatsimut isigalugu ajornartorsiutit ukiut kingulliit ingerlanerini malunnartumik annikilleriarsimasut, taamak Århus Kommuneani Isumaginninnermut Ingerlatsivik Gellerupimi ajornartorsiutit pillugit nassuiaammini allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER