Kong Carl Gustav Kujataani
Sverigemiut kunngiat ullumi Narsamut tikippoq, tassanilu Naalakkersuisunut ilaasortap Finn Karlsenip tikilluaqquaa.
Kong Carl Gustav Det kongelige svenske Videnskabsakademi ukioq manna Narsami ataatsimiinniartut peqatigalugit nunatsinniippoq. Ukioq manna ataatsimiinnissami sammineqartussaq tassaavoq: "Past Climate Change: Human Survival Strategies Royal Colloquium 26 - 30 June 2007."
Sverigemiut kunngiat taassumalu malittai marlunngormat Sverigemi naalakkersuisut timmisartuannik Narsarsuarmut tikipput ingerlaannarlu Narsamukarlutik. Narsami INUILI-mi najugaqarlutillu ataatsimeersuassapput. Ukioq manna kunngikkormiut ataatsimeersuarnerminni silamut tunngasut oqaluuserissavaat ilaatigullu Igalikumukassapput, Qassiarsummut, Qaqortukuluumut Upernaviarsummullu.