Imaassinnaavoq kalaallisut atertaartoq

Inuit aqqinik ilisimatusartut kunngissakkut paniat sapaatiuppat kuisippat qanoq atserneqarnissaanik eqqoriaapput

Etta Margrethe Ingrid Mary. Immaqalu kalaallisut atserlugu. Taamatut inuit aqqinik ilisimatusartut kunngissakkut paniata kuisinnissaanut eqqoriaapput. Kunngissakkut paniat sapaatiuppat Fredensborg Slotskirke-mi kuisissaaq.

- Naak Maryp arnarigalua Henrietta, ileqquusumik atsiunneqartaraluartoq ateq taanna nalinginnaasuuallaanngilaq. Imaassinnaavoq aamma Etta-mik taaguuseraat. Pisortatigoortumik aterinngisaatut taaguutaatulli, taamatut cand.mag. Rikke Steenholt Olesen, Københavns Universitet, isumaqarpoq.

Niviarsiaqqat naatsunik e-nik imaluunniit a-nik naanilinnik atserneqartarnerat malillugu Etta naleqquttuussaaq, ilisimatusartoq oqarpoq. Tamatuma saniatigut immaassinnaavoq kunngissakkut nuliatalu kunngitoqqat atianik atsiussaqartut, tassanilu Dagmar imaluunniit Bengend piukkunnarsinnaapput.

- Aammali imaassinnaavoq kunngissakkut nulianilu ataatsimut misigisaqarfigisimasaminnik atsiussaqartut. Sumiiffik immikkut attuumassuteqarfigisartik toqqarsinnaavaat, assersuutigalugu Sydney, tassami illoqarfimmi tassani naapeqqaarput. Aammali imaassinnaavoq kalaallit atianik alutornartumik atserneqartoq. Prins Christian inunngormat aamma taamatut ilimasuttoqaraluarpoq, kalaalerpaluttumilli atserneqanngilaq. Kalaallit atiat toqqassallugu ajornakusoortuuvoq, tassami qanoq isumaqarnersoq paasiuminaassinnaasarmat, Rikke Steenholt oqarpoq.

/ritzau/

Powered by Labrador CMS