Niaqunngunami plantimik ujaasineq
NunaMinerals nassaap pissanganartup ingerlateqqinnissaanut nunani allani suleqatissarsiorpoq
Misissugassatut nunatsinni aatsitassanik ujaasisoqarfiup NunaMinerals A/S-ip junip ingerlanerani Niaqunngunami Nuup Maniitsullu akornanniittumi katersorsimasai ujaqqanik misissuisarfiup Actlabs Greenlandimi Nuummiittumi piffissami matumani misissorneqarput.
Aatsitassanik ujaasinermi platin eqqasaatigineqarpoq, laboratoriallu Nuummiittup, canadamiut laboratoriaannit Activation Laboratoris Ltd-mit ingeranneqartup misissuinerata inerneri pissarsiarineqarniariarpata NunaMineralsip sulisuni Niaqunngunamut aatsitassanik ujaasiartortissavai.
Platin pinngortitami nassaariuminaatsuuvoq, taamaattumillu NunaMinerals piffissami matumani nunani allani suleqatissaminik platinimik ujaasinerup ingerlateqqinnissaani peqataasussamik pissarsiorpoq.
– Ingerlatsinitsinni suleqatissarsiortarneq suleriaatsitta ilagaa, NunaMIneralsip direktøria Ole Christiansen sermitsiaq.gl-imut oqarpoq.
Niaqunngunami platinimik nassaartoqarnera soqutigineqartorujussuusimavoq, nunanilu allani suliffeqarfiit sisamat isumaqatiginiareernerisigut NunaMinerals »nunami allami suleqatissamik nukittuumik pissarsisimavoq. Taannali qanoq ateqarnersoq NunaMineralsip oqaatigiumanngikkallarpaa.
– Nunatsinnili ujaasinermi siuttuunerput pissutaalluni NunaMineralsip ingerlatai nunani tamani soqutigineqartorujussuusarput, Ole Christiansen oqarpoq.