RG-mi atorfikkaaq soraalerpoq
Royal Greenlandip aningaasaqarnermut pisortaa Henning Beck ukiuni tallimani atorfeqareerluni soraalerpoq.
Henning Beckili aatsaat ukiup naanerani tunuassaaq naammaginartumik piginnaassusilimmik taartissarsiguni, Royal Greenlandip pisortaanera Flemming Knudsen siulersuisunilu siulittaasoq Peter Grønvold Samuelsen ilisimatitsipput.
Henning Beckip Royal Greenland qimanniarpaa atorfimmik allamik naaggaarsinnaanngisaminik neqeroorfigineqarsimagami. Erseqqissaatigaa Royal GReenlandip pisortaqraneratrigut piffissami kingullermi taarseeqattaarneq tunuarnerminut pissutaanngimmat.
–Akerlianik maanna pisortaalersut tatigeqaakka suliffeqarfissuullumi ineriartoqqinnissaa, aamma nuannaarutigaara suliffeqarfissuaq ingerlalluaqisoq sulilu periarfissalerujussuaq suliffigisimagakku. Tunuarnissara taamaallaat pissuteqarpoq atorfik uannut naleqqulluinnartoq neqeroorutigineqarsimammat asulu angerlarsimaffinnut qanittumi inissisimalluni, Henning Beck oqarpoq.