Ittoqqortoormiini immiortut ikittuinnaapput

Tunu ataatsimut isiginiartariaqanngilaq. Aamma imminortarneq eqqarsaatigalugu, Ittoqqortoormiit borgmeseriat tikkuaavoq.

? Inuit siusinnerusutut silaarutivillutik aalakoortarunnaarput, borgmester Erling Madsen oqarpoq.

Ukiuni kingullerni marlunni Ittoqqortoormiini imminortoqarsimanngilaq, ukiunilu kingullerni tallimani-arfinilinni illoqarfimmi marluinnaat imminorsimapput. Taamaattumik oqartoqarsinnaanngilaq tunu imminornissamut ulorianartorsiorfiunerpaasoq. Taamatut borgmester Erling Madsen oqarpoq, Kristeligt Dagbladimi Tasiilami imminortarnermik allaaserisamut qisuariarluni.

Borgmesterip tikkuarpaa Ittoqqortoormiit illoqarfiat Tasiilap politeeqarfianut ilaasoq, tamannalu tunumik kukkusumik takutitsinerusinnaasoq.

– Politeeqarfimmi isorartoorujussuuvoq, Ittoqqortoormiinili tupigusuutigisarparput tusagassiorfiit allakkaangata tunumi imminortorpassuaqartartoq. Taamatut takutitsiniarneq ilisarisinnaanngilarput, Erling Madsen Sermitsiaq.gl-imut oqarpoq.

Taanna isumaqarpoq 2001-imi imigassap sakkortuup matuneqarnera nassuiaatissat ilagigaat, sooq Ittoqqortoormiini ukiuni kingullerni imminorrtoqarneq ajorneranut.

– Imigassap kimittuup, soorlu snapsip, matuneqarnera annertunerpaamik tamatumunnga pingaaruteqarsimagunarpoq. Inuit siusinnerusutut silaarutivillutik aalakoortarunnaarput, Erling Madsen oqarpoq.

Tamanna peqatigalugu tikkuarpaa inuusuttunut sunngiffimmi neqeroorutit amerlanerulersimasut soorlu inuusuttut illuannik, timersortarfimmik diskotekimillu. Tamatumuunkkullu inuusuttut kamassaminnik pitsaanerusumik annissisinnaalerput, borgmesteri naapertorlugu.

Powered by Labrador CMS