Dash-7 motorilliorluni Kangerlussuarmut mittariaqarpoq
Dash-7 tallimanngormat Kangerlussuarmiit Nuuliaraluartoq motorit sisamaasut ilaata orsussamik pilersorneqarnera ajornartorsiuteqqalermat Kangerlussuarmut utertariaqarsimavoq.
Timmisartoq sisamanik motoreqarani pingasuinnarnilli motoreqarluni mittariaqarsimavoq.
Air Greenlandimi tuniniaanermut nittarsaassinermullu pisortaq Christian Keldsen oqarpoq, timmisartoq pissutsit nalinginnaagaluarpata motorit pingasuinnaat atorlugit Nuummut missimasinnaagaluartoq.
- Ullorli taanna saneraaniit anorlermat motorit sisamat tamarmik atortariaqartussaappuut. Taamaattumillu isumannaatsuunissaq pissutigalugu timmisartoq utertariaqarpoq, Christian Keldsen oqarpoq.
Ilanngullugulu erseqqissaatigaa, ikummatissamik pilersuineq ajornartorsiutaaleraluarmalluunniit aarleriartorsiortoqarsimanngitsoq.
Pisariaqassappat Dash-7 motori ataasiinnarluunniit atorlugu missiinnaavoq. Motorip ataatsip atunnginnera soorunalimi timmisartumi malugineqarsinnaavoq, kisianni ulorianaateqanngilaq, Christian Keldsen oqarpoq. Taamatullu ajornartorsiortoqartarnera qaqutigoortuunerarpaa.
Kingullermik ukiut pingajuat avillugu siornatigut taamatut pisoqarnikuuvoq, direktøri oqarpoq.
Eqqorluinnartumik pissusilersortoqarpoq
Ilaasut ilaata timmisartumi inuttat taamatut pisoqarnerata nalaani eqqorluinnartumik pissusilersorsimanerarlugit nersualaarpai.
Kaptajnip ilaasut tamaasa ornittarlugit ajornartorsiut pillugu nassuiaateqqissaarpai, ilaasoq nassuiaavoq.
Kangerlussuarmut mimmata qatserisartut ikeqattaartunik qulleqarlutik mittarfiup sinaani piareersimapput. Minnerli ajunngilluinnartumik pivoq.
Kangerlussuarmut mimmata timmisartoq iluarsaanneqarpoq. Nalunaaquttallu akunnerini pingasut qaangiummata Nuuliarlutik aallaqqipput.