Nannut savanik saassussisut aallaaneqartut

Sapaatiummat Igaliku Kujallermi savaatillip nanoq piaraalu marluk aallaasariaqarsimavai, nannut savanik saassussimmata.

Nanoq arnaviaq piaraalu marluk, taamatut isikkoqartarput savarnianngikkaangamik.

Kujataani savaatillit ilaat sapaatip akunnerata naanerani naatsorsuutiginngisaminnik nanumik arnaviamik piaraanillu angisuunik marlunnik qaninngoorneqarput.

– Nannut Igalikumi Kujallermi savaateqarfimmut takkussimapput. Savaatillit nannut qunusaarlugit qimaatinniarsarigaluarpaat, iluaqutaanngitsumik. Nannut uumasuusiviit ilaannut iserput savallu saassullugit, Narsami politeeqarfiup ittua Olav Nielsen oqaluttuarpoq.

Savaatillit Narsami politiinut saaffiginnipput, taakkualu Namminersornerullutik Oqartussanut saaffiginnipput.

– Tamatuma kingorna Aalisarnermut Piniarnermullu Pisortaqarfik akuersivoq nannut aallaaneqarsinnaasut, politeeqarfiup ittua nassuiaavoq.

Tamatuma kingorna Qaqortumi piniartut peqatigiiffianni ilaasortat ilaat Igalikumut Kujallermukarput nannut pilakkiartorlugit, neqaallu pisortat ingerlatsiviinut, soorlu napparsimmavimmut utoqqaallu illuannut agguaanneqarput, Olav Nielsen paasissutissiivoq.

Powered by Labrador CMS