Skip to main content

Immaq naqqatigut kabelissaq piariilerpoq

Telep naatsorsuutigaa immaq naqqatigut kabelissaq 2008-mi ukiukkut atulersinnaassasoq. Tamatuma pigissaasanik annertulerulersitsillunilu internetikkut attavinnik sukkanerulersitsissaaq

Tele Greenlandip Atlantikorsuaq ikaarlugu immap naqqatigut 4.600 kilometerinik kabeliliinissamik pilersaarutaa siumukarpoq.

– Pilersaaruterput ingerlalluareerparput. Tele Greenlandip suliassaasa annersaat naammassereerpoq, ilimagaarpullu Kalaallit Nunaata aappaagu ukiup naajartornerani tamanna iluaqutigisinnaanerumaassagaa, Tele Greenlandimi teknikkikkut pisortaaneq Jørn Jespersen Ingeniørimut oqarpoq.

Kabelip Kalaallit Nunaat Islandimut Canadamullu attavilissavaa, taamaalillunilu Kalaallit Nunaanni qarasaasiakkut paasissutissanik ingerlaartitsineq annertusigaluttuinnartoq iluaqusersinnaalissalluni.Immap naqqatigut kabelissaq Tele Greenlandip 500 aamma 700 millioner kronet akornanni aningaasaliiffigisimavaa. Piginneqatigiiffiup kabeli kabelimillu siaarsisussaq suliarinnittussarsiuussimavaa, septemberillu ingerlanerani suliarinnittussarsiuussinermi suliffeqarfinnit neqerooruteqartunit tusagaqarumaarnissani.

Immap naqqatigut kabelissaq Tele Greenlandip siulersuisuinit Kalaallit Nunaannilu Naalakkersuisunit ukiap ingerlanerani akuersissutigineqartussaavoq.

Kabelip aqqutissaa pitsaanerpaaq nassaariniarlugu italiamiut umiarsuaata juulimi aggutsimilu Islandip, Kalaallit Nunaata Canadallu akornani angalalluni imartat naqqi sukumiisumik misissuiffigalugillu nalunaarsoqqissaarsimavai.

– Kabeli Atlantikorsuaq ikaarlugu immap naqqani quppatigut itisuukkoortinneqassaaq. Aqqutissaata aalajangerniarneranik suliaq annertoqaaq, Jørn Jespersen oqarpoq, taassuma immap naqqata nalunarsornissaanut 33 mio. kr-nit atugassarai.

Suliap unamminarnersaraa kabelip aqqutissaviata nassaariniarnera. Immap naqqani innaallaarluit inngisissut, iluliarsuit 1.600 meterinillu itissusilimmi kilisaatit qalorsui tassaapput aporfiit kabelip siaarniarnerani avaqqutassat, taamaalilluni kabelip kipisoorsinnaanera pinngitsoortinneqassappat.

– Aalisartut ajornartorsiutaanerpaasimapput. Ima ititigisumi kilisattarput, allaat uagut aqqutissagut taakkununnga naleqqussartariaqartarlutigit. Kabelip 1.600 meterinik ikkannerusumi inissiffiani immap naqqanut assaattariaqartarsimavarput, aalisartunit ajoquserneqaqqunagu, Jørn Jespersen iluliarsuarnut ernumannginnerusoq oqarpoq.

– Iluliarsuit suminngaaniit aggersarnersut nalunngikannerparput, aammalu immap qaavaniit taamaallaat 200 meeterinik ititigisumut killittarput. Sinerissani taamaallaat ajornartorsiutaapput, kabeli taamaattuni qupparsuarnut itisuunut iluliarsuit angusinnaanngisaannut inissittarparput, Jørn Ingeniørimut oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER