Arnatsialaat pillugu atuagaq nutaaq
Majip 9-anni nal. 16.15 atuakkap nutaap saqqummersinneqarnera assinillu saqqummersitsinerup ammarneqarnera Katuami nalliussineqassaaq.
Tusagassiortoq Pia Christensen assiliisorlu Ulrik Bang panitsik Aviaja ilagalugu ukiuni arlaqartuni Kalaallit Nunaat tamakkipajaarlugu angallavigisarpaat.
Savaateqarfimmiipput, illoqarfinniillutik nunaqarfinniillutillu. Tikiffigisaminni tamani arnat attortissutigisarpaat alutorsaatigisarlugillu, inuunerminni assigiinngeqisunik atugassaqartitaagaluarlutik, tupinnaannartumik piginnaaneqarlutik pitsaalluinnartumik inuuneqalersinnaasarmata.
Taakkunannga arfineq marluk sapiillutik ammasumillu inuunerminni namminneq oqaluttuassartik saqqummiuppaat. Inuunermi atugarisat assigiinngilluinnartuusut oqaluttuarineqarput, taamaattoq Therecie, Makkak, Najâraq, Juaanna, Maarat, Heidi aamma Marianne assigiissuteqarput, tassalu nammineq toqqagaqarsimagamik, ullumikkullu killiffigisartik anguniarlugu sulerulussimallutik. Inuunerisimasartik siunissartillu ilisimaaraat, inoqatiminnullu tunniussassaqarlutik.
Kalaallit Nunaanni sumi tamarmi nukittuunik arnaqartoq takutinneqarpoq, aammalu pilluarneq, nukittussuseq sunniuteqarsinnaanerlu aningaasaqarnermut partiikkuutaarlunilu politikkilerinermut attuumassuteqartariaqanngitsut takutinneqarluni. Ilisimaaralugu toqqaanerit, tunniusimaneq ilaanneeriarlunilu angusaqarusussuseq pilliuteqartariaqarnerlu ataqqineqarnermik imminullu ataqqinermik kinguneqarsinnaasartut.Atuagaq arnat taakkualu avitangiisaasa qaninnerpaat assinginik kusanaqisunik ulikkaarpoq.
Pingasunngorneq 9. maj nal. 16.15 Katuami aaqqissuussinermut kikkut tamarmik tikilluaqqusaapput. Saqqummersitsisarfik Milik kaffillerpoq, aammalu Arnannguaq Gerstrøm qarlortaammik tværfløjtemik tusarnaartitsissalluni.