Påskikkunni angallassineq kinguaattoorfiuvoq
Silap ajornera pissutigalugu Air Greenlandip påskikkunnut angallassinera kinguaattoorfiuvoq.
Sineriammi silap ajornera pissutigalugu Air Greenlandimik angalasut kinguaattoornernik eqqugaapput.
Ullumikkut ataasinngorneq 2. april Ilulissaniit Sisimiuniillu Kangerlussuup tungaanut timmisartuussisoqarsinnaasimanngilaq, Nuummiit/-mullu timmisartuussinerit pissusissamittut annikitsuinnarmillu kinguaattoorfiusumik ingerlasimasut. Naatsorsuutigineqarpoq ataasinngornermi ualikkut aamma Maniitsumut timmisartuussinissaq silap ajornera pissutigalugu ajornassasoq. Arfininngormat ullumikkullu Kulusummut timmisartuussinissaagaluaq taamaatiinnarneqarsimavoq, Air Greenland nalunaarpoq.
Airbusi, Norsaq, kiisalu Boeingi, Kunuunnguaq akunnerup aappaata affaanik kinguaattoorfiusumik Københavnip tungaanut ingerlapput. Timmisartut taakkua marluk påskernissaa pissutigalugu tamarmik ingerlaartinneqarput.
Diskobugtimi aammaattaq Qasigiannguanut/-niit aamma Qeqertarsuarnut/-niit timmisartuussinerit silap ajornera pissutigalugu kinguaattoorfiusimapput.
Air Greenlandimi timmisartuni inissat tamakkerneqarsimapput, ilaatigut påski pissutigalugu ilaatigullu ilaasut umiarsuartussaagaluit timmisartukkut ingerlanneqassammata.
– Nalliuttut umiarsuaqannginnissaalu pissutigalugit timmisartuussinissat amerlisarsimavagut, taamaattumillu silap kinguaattoortitsineranit qaavatigut eqqugaavugut. Neriuppugut tamanna påskeferiartunut sunniuteqarnerlussanngitsoq, Air Greenlandimi Tuniniaanermut Nittarsaassinermullu pisortaq, Christian Keldsen, oqarpoq.
Ilaasussat tekst-TV-mi hjemmesidemilu malinnaanissaat innersuussutigineqarpoq.