Meeqqat suliaritinnissamut utaqqisut arlallit

Meeqqat 0 - 14-inik ukiullit amerliartuinnartut eqqarsartaatsikkut katsorsaavimmut innersuunneqartalerput.

Ukiormanna meeqqanik 38-nik innersuussisoqareersimavoq, taakkulu eqqarsartaatsikkut katsorsarneqarnissamut utaqqipput.

– Eqqarsartaatsikkut meeqqanik katsorsaanerup tungaa nukissaqarfiginerusariaqarparput, AI-imi allaffissorluni aqutsinikkut nakorsaaneq Helle Charlotte Knudsen oqarpoq.

Meeqqat eqqarsartaatsikkut atugarliornerulersimappat?

– Naamik, uanga taamaassorinngilara. Sinerissami iliuuseqarnissamut periarfissarissaarnerulersimavugut. Sinerissami PPR aaqqissuulluarneqarnerusimavoq taamaattumillu PPR-eqarfiit allaninngaanniit meeqqat tungaasigut periarfissarissaarnerulersimapput. Taakkulu meeqqat eqqarsartaatsikkut katsorsarneqarnissamik pisariaqartitsisut nassaarilertornerusarpaat.

– Meeqqanut psykologerput meeqqanillu eqqarsartaatsikkut katsorsaanermi siunnersorterput sapaatit akunnerini marlunni sinerissami angalallutik meeqqat sapinngisamik amerlasuut suliarisarpaat, tamannali suli naammanngilaq.

– Meeqqanik eqqarsartaatsikkut katsorsaasarnerput ukiorpassuarni annertusaavigineqarnikuunngilaq, Helle Charlotte Knudsen oqarpoq.

2000-imi meeqqat 61-it eqqarsartaatsikkut katsorsaanermut immikkoortoqarfimmi suliarineqarsimapput. 2006-imi 128-ngorsimapput, 2007-milu ikinnerpaamikk 140-nissaat naatsorsuutigineqarpoq, taakkunanngalu 38-it innersuunneqareersimapput.

Meeqqat Dronning Ingridip Napparsimmavissuata meeqqanik eqqarsartaatsikkut katsorsaaviani suliarineqartartut amerlanersaat uatsimemik, asperges syndromimik kinguarsimanermillu aammali ADHD-mik (nakkutigineqartariaqarnermik, uninngasinnaannginnermik ilioriataartarnermillu) ajoquteqartuupput.

– Sinerissami napparsimaviit, PPR-it, paaqqinnittarfiit kiisalu Bispebjerg Hospitalip meeqqanut inuusuttunullu eqqarsartaatsikkut nappaatilinnut immikkoortoqarfia, meeqqanik eqqarsartaatsikkut katsorsaasutta ulluinnarni suliffigisaa, suleqatigilluarpagut.

Sermitsiaq atuaruk....