Ajortortarisinnaasaa
Takornariaqarnerup ingerlanera ima equsoortigisinnaavoq ajutoortitsiinnalersinnaalluni, Naja Habermann www.iluliarmioq.gl - mut oqarpoq
– Ukiuni kingullerni takornariaqarneq nunarsuarmi nunani assigiinngitsuni ineriartornermi ajornartorsiutinik inaarsisutut suaarutigineqartarpoq – aamma Kalaallit Nunaanni. Kisiannili aamma takornariaqarnerup nunani piffinnilu assigiinngitsuni takornarissanit orninneqartartuni takornariaqarnerup ajornartorsiutinik ilungersunanartunik pilersitsimaneranut assersutissarpassuaqarpoq. Aningaasat kisimik takornariaqarnermi ineriartortitsinermi aqutsisuugaangata ajornartorsiutit takkuttarunarput, Naja Habermann iluliarmiumut oqarpoq.
– Ilaatigut ineriartorneq equsuungaarami ajutoorfinngornikuulluni. Annilaarnartutut Spaniap kujataata sineriaa assersuutigineqarsinnaavoq, tassani ineriartornermut peqataarusunnerujussuup nassatarisaanik sissat sinerlugit hotelerpassuit sanaartorneqangaarmata naggataatigut takornarissanit ornikkumaneqarunnaarput. Aatsaat illoqarfinni ingutserinerit allanngortitereqqinnerlu ingerlanneqareermata takornarissat takkuteqqittalerput.
– Nunani issittuni avannarlerni immikkut ajornartorsiut tassaavoq inuiaqatigiit ikittuuneri assersuutigalugulu angallanenermit eqqagassanillu sunnertiasorujussuunerat. Najugaqavissut umiarsuarni, helicopterini timmisartunilu inissaasuasinnaasarput. Aamma Oqaatsuni takornarissat najugaqartut tapersersorsoralugit pisiniarfimmi annertuumik niuerniartarnerat ajornartorsiutaasinnaavoq – taamaallutik nunaqarfimmi najugaqartut nioqqutissanik, angallanneqarneri inuiaqatigiinnut akisuujusunik, naammattunik pissarsisinnaajunnaartarput.
– Kalaallit Nunaanni pinngortitaq immikkorluinnaq ittuusoq, pingaarnertut takornarissat Kalaallit Nunaannut angalanisaminnik toqqaanerannut peqqutaasartoq, tamannalumi aamma tikeraat amerliartornerannit eqqorneqarpoq. Tikeraat amerlinerannit naasut nunalu nungullarsarneqarput, tassa nunani issittuni pinngortitaq piffissaq sivisoorujussuaq atorlugu imminut pilerseqqittarmat. Qaqqani, silaannarmi immamilu angallannerup annertusineratigut uumaasut akornusersorneqarput. Tamanna imminut assortortutut ippoq, tassa takornarissat Kalaallit Nunaanni uumasut takunissaat sinnattuarisarmassuk. Takornarissat amerlasuut pinngortitami eqqakkat akuersaanngitsorujussuuaat, tassa ’inuilaarsuaq’ allanit attorneqarsimanngitsoq misigerusullugu ungasissorsuarmit angalasimanertik pissutigalugu. Kisiannili tamanna equutissianut, namminneq sumi tamani qimaannagaannut, atuuppasinngilaq, Naja Habermann isumaqarpoq.