IMAK kattuffiliorusuppoq
– Suleqatigiittut nukittuumik aalaniataartumillu kattuffiliorusuppugut. Isumaqarpugut kattuffik nukittooq aalaniataartorlugu taamaattoq aatsaat pilersissinnaagipput ilinniartitsisut ilinniartitsisoqatigiikkuutaat tamarmik ilaasortaaffigisaannik kattuffiliorutsigik, Sivso Dorph oqarpoq.
– Sulisitsisut ullumikkut ajornannginaavillugu kattuffiit imminnut aporaatsittarpaat, siulittaasoq Sivso Dorph oqarpoq, IMAK’ip 16.-17. april ileqquusumik ataatsimeersuarnerani.
– Isumaqarpunga nunatsinni suliffeqarnermi kattuffilersornikkut aaqqissuussaanerup missuataarnissaanut maanna piffissanngortoq, siulittaasoq nangilluni oqarpoq.
Sivso Dorphip oqaatigisai naapertorlugit nunatsinni suliffeqarnermi kattuffilersorsimaneq taamani Kalaallit Nunaannut Ministereqarfiup isumaqatiginiarneqartarnerata nalaaneersuuvoq.
– Sinniisoqarfimmi ilaasortat tamakkerlutik siulittaasup oqaatigisai taperserpaat. Malussarniarluta misissuilaareerpugut, tamakkualu takutippaat taama pilersitsiniarnissaq assut soqutigineqartoq, neriuppugullu kattuffeqarnikkut qanoq aaqqissuussisoqarsinnaaneranut siunnersuumik sinniisoqarfitsinnut aappaagu saqqummiussisinnaassalluta, Sivso Dorph oqarpoq.