Diskobugtimut timmisartuussinermi immikkut pilersaarut
Air Greenlandip qulimiguulia S-61 Ilulissat eqqaanni minnerliorluni akornusermat, Air Greenland maanna Diskobugtimi timmisartuussinissamut immikkut pilersaarusiorpoq
Timmisartuussinissami immikkut pilersaarummi tunngavigineqarpoq S-61 qulimiguulik Nuummiitsitaq Diskobugtimi 15. maj tikillugu sisamanngornermiit ataasinngornerup tungaanut timmisartuussisassasoq. Majip 15-aniit decembarip aallaqqaataanut Air Greenlandi Diskobugtimi timmisartuussinissamut kiffartuussinissamik isumaqatigiissuteqanngilaq. Tamatuma saniatigut ingerlaarfiit ilaat qulimiguulimmik Bell 222-imit isumagineqassapput, Air Greenland nalunaarpoq.
Pilersaarummi matumani ilaasussat inniminneereersut ulluni tikiffissaminni apuussinnaassapput. Ingerlaarfissarli ataaseq siuartinneqalaassaaq, tassa Qasigiannguaniit marlunngornermi 24. april Ilulissiartussat ataasinngornermut 23. april-imut siuartinneqassammata. Ilaasut taakkua ingerlaqqinnginnerminni Ilulissani hotelimi unnuisinneqassapput, tamannalu pillugu Air Greenlandimiit ilisimatinneqassapput.
Qulimiguuliup S-61-ip Nuup Ilulissallu akornanni utertaarnissaa iluatsillugu ingerlaarfik taanna ilaasunit bilitsisiffigineqarsinnaanngorpoq. Sisamanngornermi Nuummiit, Kangerlussuaq, Sisimiullu aqqusaarlugit Ilulissanut, kiisalu ataasinngornermi Ilulissaniit Aasiaat Kangerlussuarlu aqqusaarlugit Nuummut ingerlaartassaaq. Bilitsit internetikkut www.airgreenland.gl imaluunniit Air Greenlandip bilitsileriffiini pisiarineqarsinnaapput.