INI-p attartortui Radiop qaqqaaniittut suleqataanissamut soqutiginninngitsut?
NUTARTIGAQ: Weekendimi INI-p attartortuni Nuummi Radiop qaqqaaneersut, ataatsimiinnermut qaaqquai. Qaaqqusissutit 60-it agguaanneqarput, ikippallaartulli takkussimammata ataatsimiinnissaq unitsiinnarneqarpoq. -Takkuttukinneranut pissutaasut ilagigunarpaat, qaaqqusissummi allaqqanngimmat kikkut qaaqqusisuunersut, ineqartoq oqarpoq.
Ataatsimiisitsinissamut tunuliaqutaavoq, Namminersornerullutik Oqartussat kiisalu Nuup Kommuneata suleqatigiillutik suliaq aallartissimasaat, "Illoqarfimmi nutarsaaneq kiisalu inissianik pitsanngorsaaneq" - suliaq attartortut peqatigalugit ingerlasussaq.
INI-p eqqarsarnartoqartippaa ineqartut suleqatiserineqarlutik periarfissinneqarnerat atorluanngimmassuk, tassami tamakku kingunerisinnaavaat inuit qulaatiinnarlugit aalajangiinerit, INI nalunaarpoq.
Susanne A. Markdal ataatsimiigiaraluarpoq.
- Isumaqanngilanga Radiop qaqqaani najugallit INI-mik suleqateqarnissaminnut soqutiginninngitsut. Takkuttukinnera allanik peqquteqarsoraara. Qaaqqusissummimi allaqqanngilaq kikkut qaaqqusisuunersut. Aamma allaqqanngilaq illut uiguleriiaat kisimik eqqartorneqassasut. Paasissutissat taakku allaqqasuuppata ilimagaara takkuttoqarnerusimassagaluartoq. INI kommunelu arlaleriaqaluta ataatsimeeqatigisareerpagut, siunnersuuteqartarlutalu - utertitsivigineqarnerli ajorpugut. Isumaqarpunga ineqartut qatsukkaat ataatsimeeqattaarnerit akineqarneq ajortut. Aamma blokkersuarni najugaqartut, uagullu illuni uiguleriiani ineqartuusugut ajornartorsiutigut assigiinngeqaat. Uagut qatsupparput blokkersuarni opgangit maajunnartut eqqartorneqakulanersui, Susanne A. Markdal oqarpoq.
INI-p ataatsimiisitsinerit, Radiup qaqqaanut tunngasut tulliani ulluni ukunani ingerlanneqassapput:
Martsip 17. – 18.-ani 2007 Radiup qaqqaata katerisimaartarfiani. Blok 21 – 37
Marstip 24. – 25. –ani 2007 Radiup qaqqaata katerisimaartarfiani. Blok 11 – 17