Skip to main content

?Borgmesterit: Iluarsaaqqinneq kinguartilli

Naalakkersuisut aaqqissuussinermut ataatsimiititaliap siunnersuutaanut tunngatillugu tunuartilersut nunatsinni borgmesterit isumaqarput.

Asu naammaleqaaq! Kommunit iluarsaateqqinneqarnissaannut tunngatillugu kommunit naalakkersuisut naalakattaaginnarumajunnaarpaat.

Borgmesterit ulluni makkunani borgmesterit kommunaldirektørillu Københavnimi ataatsimiinneranni peqataasut iluarsaaqqinnissaq pillugu naalakkersuisut kiliffimmik naliliinerat, tallimannngormat Inatsisartunut saqqummiunneqartoq, pitsaanngitsutut nalilerpaat.

– Naalakkersuisut Aaqqissuussinissamut Ataatsimiititaliap siunnersuutaanut sanilliullugu allanngorterisimangaarmata suliassat kommuninut tunniunneqartussat oqaluuserinnissaannut sivisunerusumik piffissalerneqartariaqarpugut, Maniitsup borgmesteria Søren Lyberth (Siumut) oqarpoq.

Borgmesterit iluarsaaqqinnerup 1. januar 2010-mut kinguartinneqarnissaa kissaatigaat.

– Naalakkersuisut siulittaasuata Hans Enoksenip oqarfiginikuuaatigut Iluarsaassinermut Ataatsimiititaliap siunnersuutai malinneqarumaartut uagullu isumakuuluutissaqanngitsugut, massakkulli allatorluinnaq oqalulerput, taakkulu oqaluuserinissaannut uagut sivisunerusumik piffissaqartariaqarpugut, Søren Lyberth oqarpoq.

Naalakkersuisut iluarsaaqqinnissap sumut killinneranik nalunaarusiaat kommuninut saqqummiunneqarsimanngilaq, tamannalu borgmesterit iluarinngilluinnarpaat.

– Immikkoortut pingaarutillit ilanngunneqarsimanngillat, Aaqqissuussinermullu Ataatsimiititaliap siunnersuutaanut akerliulluinnartumik suliassat ilaat Namminersornerullutik Oqartussanit tiguneqartussatut siunnersuutigineqarsimapput, Søren Lyberth oqarpoq.

Sipaarutissat nalorninartut

Aaqqissuusseqqinnermut ataatsimiititaliap allaffissornikkut sipaarutissatut taggissai 218 mio. kr.-it ilumut anguneqarsinnaanersut kommunit nalornivaat.

Ikinnerpaamik 130 mio. kr.-it nalinginut sipaarutissat ilumut anguneqarsinnaanerat apeqquserpaat.

Naalakkersuisut nassuiaamminni tunngavilersorsimanngilaat qanoq ililuni aningaasarpassuit tamakku sipaarneqassanersut.

– Allanngortiterinissamut tunngaviusut allanngortikkamikkik aningaasanik sipaarutissartaasa qanoq pinissaannik naalakkersuisut misissuilluarsimannginnerat kommunit ernumassutigilluinnarpaat, inatsisartunut naalakkersuisunullu allakkaminni ammasuni taama allapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER