Kattussuunnissaq ernummaatigaat

Kommunit 2009-mi kattussuunneqarnissaasa kinguartinneqartariaqarneranik borgmesterit oqariartuutaat inatsisartuni partiit akornanni ernumassutigineqarpoq.

Demokraatit siulittaasuata Per Berthelsenip borgmesterit oqariartuutaat tupigusuutigaa:

- Apeqqutit taama pingaaruteqartigisut oqimaatsigisullu siusinnerusukkut qaqinneqarsimanngimmata tupigusuutigaara, Per Berthelsen oqarpoq, nangillunilu:

- Borgmesterit naalakkersuisunut saaffiginnissutaat naalakkersuisunit qanoq tiguneqassanersoq Demokraatit tungaaninngaanniit torersumik naalaassavarput, taannalu aallaavigalugu oqallinnermut torersumik peqataassalluta.

Taamatuttaaq Naalakkersuisooqatigiinnut ilaasut Inuit Ataqatigiit inatsisartuni ilaasortaatitaat Ane Hansen borgmesterit nalunaarutaat aamma tupigusuutigai:

- Taamatut saqqummiineq Inuit Ataqatigiinnit tupaallaatigalugulu paatsuunganartoqartipparput, pissutigalugu Qeqqata kommunerujussuassaa qanittukkut nalunaarutigimmagu siusinnerusukkut nammineq aallartikkusullutik. Avannaata kommunissaa assinganik aamma nalunaaruteqarpoq, Inuit Ataqatigiit kommuninut tunngasunut oqaaseqartartua Ane Hansen oqarpoq.

Kommunit kattussuunneqarnissaat pillugu annertunerusumik oqaloqatiginninnikkut aaqqiinissaq orniginartikkitsik IA aamma Demokraatit oqaatigigaat, knr.gl nalunaarpoq

Powered by Labrador CMS