Pingaarnerutitaq: Erseqqissorsuarmik tillittut

Namminersornerullutik Oqartussat oqaluttuarisaaneranni nutaanerusumi kanngunartuliat annersaat unammillikkatta Atuagagdliutit sapaatit akunnerini kingullerni qulaajaaffigaat. Torrak.Milliuunerpassuarnik nalillit inunnut iluanaartunut ikittuinnarnut, piffissami eqqortumi sumiiffimmi eqqortumiittunut tunissutigineqarput.Namminersorneeullutik Oqartussat illuutaat akikinaangaarlugit tunineqarput. Nalingisa affarinngisaannilluunniit akilersillugit.

Illullu akiisa 40 procentii ukiuni 20-ni ernialersorneqaratillu akilersorneqassanngillat. Namminersornerullutik Oqartussat aningaasalersugaannik.

Ukiuni 15-20-ni kingullerni illuni namminersortunngorsaalersimaneq tamakkiisumik tapersersorparput, tamannalu tamanut iluaqutaavoq inuiaqatigiillu aningaasarsiornerata qaffakkiartorneranut iluaqutaalluni.

Malittarisassallu tamanut iluaqutaammata aamma attartortuunermiit piginnittuunermut aaqqissuussineq tapersersorparput.

Ikittuinnaalli immikkut ittumik pineqarnerat akerleraarput. Tassanimi iluaquserneqarput malittarisassiortuusut. Tassalu namminersornerullutik oqartussani atorfillit politikerillu.

Milliuunerpassuarnik nalilinnik, ukiualunnguit qaangiuppata tunisinnaasaminnik tunisissimapput. Illut namminneq atussanngikkunikkit attartortissinnaavaat, iluanaarutigerujussuarlugit tuninissaasa tungaannut.

Taamaaliorneq atorfimmik pissaanermillu atornerluinertut taajumavarput - imaluunniit inuiaqatigit tamarmik akerliuffigisariaqagaattut erseqqissorsuarmik tillinnertut. Inuit ikittunnguit milliuuninik ataatsinik marlunnilluunniit tunineqarput, ukiut qulit qaangiuppata aningaasanngorlugit tigusinnaasaminnik. Akileraaruteqannguanngitsunik sipaagaqartinneqarlutik.

Malittarisassat massakkut allanngortikkaluarpaat, allanngortinneqannginnerinili atornerlorujussuarneqareersimapput, pissutsinik ilisimannittunit, periarfissanillu atornerluinnikkut imminnut iluaqutissiorsimasunit. Taamaaliorneq ilisimaqasaqeerluni aktianik niunermik iluaqutiginnipiluttarnertuulli kusanaatsigaaq.

Malittarisassallu allanngortinneqarmata aamma taakkuninnga atornerluisimasut suli anginerusumik iluaqutissinneqarput. Konjunkturpant-imik taaneqartartoq ukiunit quliniit ukiunut tallimanut appartinneqarpoq. Taamaalillutillu suli siusinnerusukkulli aningaasanngortitsisinnaalerput.

Kakkaqaasi - pisortani atorfillit politikerillu - taamanna iluaqutiginninniapiluttoqartarpoq. Malittarisassaqanngikkaluarpat taamaaliorneq pinerluttuliornerunerassagaluarparput. Tassami ileqqorissaarnikkut pinerluttuliorneruvoq.

Taamatullu pisoqarpoq namminersornerullutik oqartussat oqaluttuarisaaneranni kikkut tamarmik sipaaqqusaaleruttornerisa nalaanni, aningaasat ilinniarnermut, peqqinnissamut angallannerullu pitsanngorsaavigineqarnissaanut pisariaqartinneqarleruttornerisa nalaanni.

Inuit ikittunnguit imminnut iluaqutissiorlutik namminersornerullutik oqartussat illutaannik tunisipput, allalli tamarmik akileruujussuarlutik ineqartariaqartarput.

Ilinniartulluunniit kollegiani najugallit direktørit illunik qaammannut 2.000 kroniinnarnik akilertagassaminnik imminnut tunisimanerat kusanaagaat. Aningaasanik namminneq sipaagassaminnik.

Atorfillillu politikerillu taakkua ilinniagaqartut inigisaminnut akikiliinikinnerusalernissaannut ikiorumanngilaat.

Eqqaaginnarsinnaavagulluunniit utoqqalinersiallit allallu akissarsiakitsut, ineqarnermut akiliinissaminnik ajornartorsiuteqartartut.

Atorfillit politikerillu inuiaqatigiinnik sullissisuusussaapput inuiaqatigiillu naapertuilluarnerpaamik aquttussaallugit. Paarlattuanilli imminnut iluaqutissiorput. Nunani allani pissaanillittut assigerusunngisatsitut iliortoqarnera ittuujummernartuuvoq.

Aningaasaqarnermut ataatsimiititaliaq 2004-imi nalunaarpoq, »ilaqutariit ataasiakkaat illuinik akikinaarujussuarlugit tunisisarneq politikikkut aningaasaqarnikkullu naaammaginanngilluinnarpoq, piaarnerpaamillu unitsinneqartariaqarluni«.

Naalakkersuisullu Inatsisartunit qinigaasut naalanngillat, pisortallu illuat kingulleq december 2006-imi tunineqarpoq.

Tamanna akileraaruseriffiup suliassarinnginnerlugu? Tunissutit taama angitigisut akilersaaruserneqartussaanngillat?

Ombudsmandilu kajumissarumavarput tassani atorfinnik pissaanermillu atornerluisoqarsimannginnersoq misissoqqullugu.

Powered by Labrador CMS