Anorersuarnera pissutigalugu angalasut unittooqqapput

Kalaallit Nunaata kitaani anorersuarujussuarnera pissutigalugu ataasinngormat angalasut 500-t sinerissami sumi tamaani unittooqqapput.

Ilaasut 120-it missaanniittut ullumi Københavnimut aallartussaasimagaluarput, tamakkualu marlunngorpat sisamanngorpallu ingerlanniarsarineqassapput. Air Greenlandip ilaasut paasissutissileruttorpai.

Akerlianik ilaasut 200-t missaanniittut, ullumikkut Københavnimit tikittut sinerissami apuuffissaminnut ingerlaqqinnissaminnut utaqqipput.

Angalasut sinneri anorersuaq pissutigalugu unittooqqasut nunap iluani angalasuupput.

Air Greenlandip aqagu marlunngornermi martsip 20-ianni ilaasut unittooqqasut sapinngisamik amerlanerpaat timmisartuunniarniarpai. Maniitsuliartulli Sisimiuliartullu Air Greenlandip aqagu timmisartuussinnaanngilai.

Aqagumut pilersaarutit pilersaarutigineqartutut ingerlanneqassappata ilaasut unittooqqasut kingulliit sumunngarfimminnut apuutissapput pingasunngornermi martisp 21-ianni.

Arctic Umiaq Line
Ilaasut poorskip missaani Sarfaq Ittuk-mik angalasussaagaluit eqqarsaatigalugit air Greenland timmisartukkut angallassinermi immikkut inissanik ujarlileruttorpoq.

Powered by Labrador CMS