Pinngortitamut Avatangiisinullu nersornaat siulleq tunniunneqassaaq

Namminersornerullutik Oqartussat Pinngortitamut Avatangiisinullu nersornaataat siulleq ulloq 25. marts 2007 tunniunneqalerpoq.

- Nersornaasiinerup pilersinneqarneranut peqqutaavoq uagut inuiaqatigiittut inunnik, suliffeqarfinnik, pisortaqarfinnik kattuffinnillu maligassiuilluartunik suliaminnullu tunniusimalluartunik taavalu pinngortitamut avatangiisinullu ilisimasaqarnitta qaffanneqarnissaannik suleqataasunut taamatullu pinngortitap avatangiisittalu pitsanngorsarnissaat paaqqutarinissaallu anguniarlugit suliniuteqartunik nersorinninnerput takutikkusukkatsigu, Pinngortitamut Avatangiisinullu pisortaqarfik isumaqarpoq.

Aningaasat nersornaasinermut ilaatinneqartut illuatungaatigut inummut tassunga imaluunniit taakkununnga pinngortitatta kusanaqisup ataavartinnissaanik imaluunniit ilisimasaqafiginerulernissaannik immikkukajaaq suliniuteqartunut inuiaqatigiinnit iluarisimaarinninnertut takutinniarneqarput, illuatungaatigullu pinngortitap avatangiisillu pitsanngorsaanissaat anguniarlugu suliniutinut aningaasatigut tapersiinerullutik.

Peqqissutsimut Avatangiisinullu Naalakkersuisup Agathe Fontainip Namminersornerullutik Oqartussat Pinngortitamut Avatangiisinullu nersornaataat 2007 Katuap inersuaaraani sapaammi 25. marts 2007 nal. 13.00 - 15.00 tunniutissavaa.

Nersornaammik tigusisussap kinaanera tunniussinermi tusarliunneqassaaq.

Powered by Labrador CMS