Michael Binzer Air Greenlandimi pisortanngussaaq

Allaffissornermi pisortanngortussaq junip aallaqqaataani sulilissaaq, Travel People Newsletter taama allappoq.

Michael Binzer ukiup ataatsip siorna tikillugu Air Greenlandimi atorfeqarsimasoq maannakkut allaffissornermi qullersanngorluni uteqqissaaq.

Flemming Knudsen Royal Greenlandimi qullersanngortussaq taarsissavaa.

Michael Binzer (38) maannakkut SAS Danmarkmi Leisure Salesimi suliffeqarpoq taamalu SAS Danmarkip tuniniaanerata affaa oqartussaaffigalugu.

Michael Binzer aqutsisoralugu Air Greenland pisortaqalissaaq inuusuttumik, sulilluartumik suliffeqarfimmik, Kalaallit Nunaannik tamaanilu politikikkut ingerlatsinermik ilisimannilluartumik.

Michael Binzerip atorfinitsinneratigut Air Greenlandip siulersuisusa erseqqissaatigaat suliffeqarfik aningaasarsiorfittut politikikkuunngitsorlu aqunneqassasoq, Travel People Newsletter allappoq.

– Taamatut qinersinerput nuannarutigilluinnarpara. Inuk taanna pisinnaasaqarluartuuvoq, Kalaallit Nunaanni peroriartorsimasoq, nunanut allanut illinniariartorsimasoq, misilittagaqalerninilu peqatigalugu langrendertartutut Olympiadeqarnernut pingasunut peqataasimasoq, Air Greenland A/S-ip siulersuisuisa siulittaasuat Peter Grønvold Samuelsen oqarpoq.

Air Greenlandip aningaasaqarnermut pisortaa Ove Nielsen junip aallaqqaataata tungaanut allaffissornermi qullersaagallassaaq.

Powered by Labrador CMS