KNR 2006-imi amigartooruteqarpoq

Namminersornerullutik Oqartussat naatsorsuusioriaasaat amigartooruteqarnermut pissutaavoq, siulersuisut oqarput.

KNR 2006-imi 1,7 mio. kr.-nit missarpiaannik amigartooruteqarpoq, missingersuutigineqarsimagaluarluni 2 mio. kr.-nit missarpiaannik sinneqartooruteqartoqassasoq. Amigartooruteqarnermut pissutaavoq KNR-ip teknikkikkut atortuisa digitalinngortinneqarnerat, tamanna landskarsimit taarsigassarsinikkut aningaasalerneqarsimalluni.

– Politikkikkut ingerlatsineq pissutigalugu allatut taarsigassarsinissamut periarfissaqarsimanngilaq, taamaattumillu KNR-ip 4 mio. kr.-inik tigusisinnaassuseqarnini atortariaqarsimavaa. KNR-p ingerlatsivittut Namminersornerullutik Oqartussanit tapiiffigineqarlutik ingerlanneqartutut allatut atortut digitalit nalikilliliissutigisinnaasuugunigit radioqarfik tv-qarfillu 2,3 mio. kr.-inik sinneqartooruteqarsimassagaluarpoq, siulersuisut siulittaasuat Juaaka Lyberth pisortarlu Lars Lennert-Sandgreen allapput.

Atortunik pisineq ukiumi angusanut taamatut sunniuteqartigimmat tamatumunnga pissutaapput naatsorsuusioriaatsit KNR-p atortariaqagai. Tassami KNR atortutivut pigisaqaqqusaanngilaq, tamaattumillu atortunik digitalinik pisineq aningaasartuutitut isigineqarpoq, KNR-imi qullersat paasissutissiipput.

Powered by Labrador CMS