Pisitinnak eqqarsaqqaarit

Angallataatilinngortussatut apeqquterpassuaqarpoq misissorneqaqqaartariaqartunik eqqarsaatigineqaqqaartariaqartunillu, angallamik qanoq ittumik pisinissamut aalajanginnginnermi.

Angallammik pisineq aalajangerneruvoq annertooq, aningaasarpaaluillu aningaasaliissutigineqartarput.

- Aalajangerneqassaaq angallammik pisinissamut aningaasat qanoq amerlatigisut atorumanerlugit. Tamanna pisinnaavoq aningaaserivik suleqatigalugu imaluunniit nammineq eqqarsaatersornikkut, Klaus Eskildsen oqarpoq.

Taanna nammineq angallataatiliuvoq aammalu Grønlands Bådcenter pigalugu.

Tamatuma kingorna angallatip qanoq ittuunissaanut, angissusissaanut akissaanullu pisariaqartitat inissinneqassapput.

- Aamma isumassarsiatsialaavoq ikinngutit ilisarisimasallu angalanermik misilittagallit oqaloqatiginissaat isumassarsioqatiginissaallu.

Angallat nutaaq
Tullianik aalajangigassaq tassaavoq angallammik nutaamik atornikumilluunniit pisissanerluni.

- Angallammik nutaamik pisineq arlalitsigut iluaqutissartaqarpoq. Pingaartumik siullermeersumik pisisunut.

- Angallat allanit atorneqarsimanngilaq suullu tamarmik ajornartorsiuteqanngitsumik ingerlassapput. Tamatuma saniatigut pisisoq angallammut fabrikkip uppernarsaataanik pissaaq, Klaus Eskildsen oqarpoq.

- Eqqarsaatigisariaqanngilaq suut qanoq suliarineqarsimanersut. Suut tamarmik nutaajupput, aamma atortui.

- Aamma eqqarsaatigisariaqanngilaq tunisisup kiffartuussineq malissimaneraa aammalu suut tamarmik paarineqarsimanersut.

- Ajoqutertaraa nioqqutissap akia tamaat akilerneqassammat aammalu angallat naqqaniit atortulersorneqassammat.

Angallat atornikoq
Angallammik atornikumik pisigaanni angallammut nutaamut sanilliullugu aningaasarpassuarnik sipaartoqarsinnaavoq.

- Biilimik atornikumik pisinermut sanilliunneqarsinnaavoq. Pisoqaanerujartortillugu, kilometerit ingerlasimasai amerliartortillugit taava aserortoqarnissaa ulorianartoqarneruvoq.

- Biili ajoquserpat niullutit ikiortissarsiorsinnaavutit, silarlukkaluarpalluunniit.

- Angallammik taamaasiortoqarsinnaanngilaq.

- Pingaaruteqarneruvoq angallatip biiliminngarnit pitsaanerunissaa, mekaniskimik atortuisigut isumannaatsuunikkullu.

- Angalaneq sungiusimanngikkaanni silatusaannginneruvoq angallammik atornikorujussuarmik pisinissaq.

- Nutaajunerusut periarfissaasinnaapput. Angallat inuinnarmit pisiarigaanni qaqutiguinnaq uppernaquserneqartarpoq. Annerpaamik misiliummik angalasoqartarpoq, Klaus Eskildsen oqarpoq.

Motoori suna
Angallasigaanni taava motoori suna toqqarneqassava?

Pingaarnerusutut atorneqartartut pingasuupput.

- Aquuteralak, angallatip iluani motoori benzinatortoq imaluunniiit angallatip avataani motoori dieselitortoq.

Klaus Eskildsenip inassutigaa angallatit 6-6 1/2 meterinik (22-20 fodsinik) angissusillit aquuteralannik 4-taktilinnik motoorilerneqarnissaat.

- Angallatit anginerusut motoorimik dieselitortumik pilerneqartarput, taanna oqarpoq.