RAL-imi tapiissutit januaarimiit appartinneqassapput
Uuliamut aningaasallu nalinginut tapiliussaq 2 procentimik januaarip aallaqqaataaniit appartinneqarumaartoq, RAL-ip nalunaarutigaa.
Uuliap akiata appariartornera aningaasallu nalingisa appariartornera pissutigalugit, Royal Arctic Linep (RAL) uuliamut aningaasallu nalinginut tapiliussaq januaarip aallaqqaataaniit 13 procentimut appartippaa.
Tamanna 2 procentit sinnilaarlugit appariarneruvoq, decembarimi 15,35 procentiusimagaluarmat.
Uuliamut aningaasallu nalinginut tapiliussaq procentinngorlugu qaffasinnerpaamut appasinnerpaamulluunniit nalimmassarneqartassasoq, RAL-ip nittartagaani allassimavoq.
Namminersorlutik Oqartussat umiarsuaatileqatigiiffiutaata erseqqissarpaa, uuliamut aningaasallu nalinginut tapiliuttagaq iluanaaruteqarfigineq ajorlugu, uuliamut akit aningaasallu nalingisa nikittarnerisa sunniutaannut ingerlatseqatigiiffik qajannaarsarniarlugu tapiliuttagaq atortarmat.
Ukiumi nutaamiit Atlantikup imartaa ikaarlugu assartukkat 1 procentimik akitsuuserneqarnissaat pillugu tapiliussaq appartinneqarpoq. EU-p ukiumi nutaami CO2-mut akitsuummik nutaamik, Atlantikoq ikaarlugu assartuisunut eqquisumik, atuutilersinnissaanut akitsuutip atuutilernera malittaavoq.
Taakkua saniatigut RAL-ip atuisui aamma januaarip aallaqqaataaniit Atlantikoq ikaarlugu assartuinermi akigititat 6,4 procentimik qaffannerannit eqqugaassapput. Aningaasartuutit qaffakkiartornerat, assartukkat amerlassusaasa allanngorarnerat siunissamilu aningaasaliissutit akit qaffanneqarnerannut pissutaapput.