Arctic Umiaq Line aamma Hurtigruten Norge isumaqatigiissuteqarput peqatigiillutik 2024-mi nunatta sineriaani angalanernik takornarianut nutaanik neqerooruteqarniarlutik. Tamanna pissaaq MS Sarfaq Ittummi angalanerit assigiinngitsut pingasut toqqarneqarsinnaalernerisigut, umiarsuup siunissami umiarsualivinnut amerlanerusunut talittalernissaa aamma pisussaammat.

Arctic Umiaq Linep pisortaanera, Jens-Jakob Sandgreen tulluusimaarpoq suleqatigiinneq taanna isumaqatigiissutigineqarmat.

- Hurtigruten Norgemik suleqateqarnerput tulluusimaarutigeqaarput. Arctic Umiaq Linep najukkami inuiaqatigiinnik aalajaalluni sullissineranut peqatigitillugu Nunatsinni piujuartitsinissaq tunngavigalugu takornariartitsinikkut suliaqarfiup sanarfineqarnera siuttuuffigilerparput, tikeraallu nunanit tamalaaneersut tikilluaqqunerisa saniatigut aamma najukkami pingaarutilimmik naleqarnerulersitsinissaq qulakkeerneqassaaq najukkami suliffeqarfiit mikinerusut suliffeqarfimmillu aallarnisaasut suleqatigalugit nunami angallassisarnikkut kiisalu unnuinertigut nerisaqartitsinikkullu, Sandgreen oqarpoq.

Hurtigruten nittarsaassissaaq

Jens-Jakob Sandgreen Sermitsiaq.AG-mut itisiliivoq Hurtigrutenip suliassaa tassaassasoq takornarianik eqqortunik Arctic Umiaq Linemut pissarsiniartarnissaq.

- Takornariat ikigisassaanngillat, nunami tikitaminni inuunerup qanoq ittuuneranik misigerusuttut, mannalu tikillugu takornariarusuttunit amerlasuunit saaffigineqartarpugut, taakku umiarsuarnut takornariartaatinut ilaanatik nunap nammineq angallannermut neqeroorutaanut ilaarusuttuusarput. Hurtigruten nittarsaassillunilu neqeroorutitsinnik nutaanik aappaagu atuutilersussanik tuniniaasassaaq.

Jens-Jakob Sandgreen erseqqissaavoq inissat ikittuinnaat takornarianut inniminnigaasassasut aammalu nunatsinni innuttaasut salliullugit Sarfaq Ittummik angallanneqartarnerat allannguuteqartinneqassanngitsoq.

Takornariat innuttaasunik naapitsisassapput

Arctic Umiaq Line aamma Hurtigruten Norge tamarmik ileqqutoqaqarput issittum innuttaasunik angallassisartutut matumanilu sallersaarusupput, akisussaassusilimmik angallassinernut, aamma takornarianut tunngatillugu.

Ingerlatseqatigiiffiit taakku marluullutik erseqqissaatigaat mittarfissat pingasut, taakkunanngalu marluk nunat tamalaat akornanni angallannermi mittarfiusussat 2024-mi 2025-milu atuutilersinneqarpata, takornarianut neqerooruteqartarnermi periarfissanik nutaanik ammaassissasut.

Hedda Felin, Hurtigruten Norgep pisortaanera erseqqissaavoq:

- Sinerissat ilisarnarluartut atuarlugit angalaneq annertuumik misilittagaqarfigigatsigu sinerissat inuillu taakkunani najugaqartut illersorsinnaavagut, tamatumunngalu peqatigitillugu aamma ilaasutsinnut misigisassanik asseqanngitsunik neqerooruteqarsinnaalluta.