Kalaallit Nunaanni Politiit pingasunngornermi nalunaarput, Imarsiornermik Aqutsisoqarfimmit nalunaarutiginninneq tunngavigalugu umiarsuarmik takornariartaammut ikkarlissimasumik Ocean Explorerimik pisumut atatillugu paasiniaanerit aallartinneqarsimasut.

Imarsiornermik Aqutsisoqarfik Sermitsiaq.AG-mut paasissutissiivoq, aqutsisoqarfiup umiarsuup ikkarlinnera politiinut nalunaarutigisimagaa, umiarsuup isumannaatsumik angalanissaa pillugu malittarisassanik unioqqutitsisoqarsimasinnaammat.

Politiinit sisamanngornermi nalunaarutigineqarpoq, umiarsuaq nusunneqarluni kaanngartinneqarsimagaluartoq paasiniaaneq ingerlateqqinneqartoq.

Politiimik umiarsuarmiittoqartoq

Pigaartut pisortaat Malik Olesen tusagassiuutitigut nalunaarummi ima nassuiaavoq:

- Ippassaq politiimik umiarsuarmiititaqarpugut, taannalu umiarsuup ikkarlinnissaata tungaanut pisunik qulaajaanissaq siunertaralugu paasiniaanermik aallartitaqarpoq, tamatumunngalu atatillugu inuttanik arlalinnik killisiuivugut.

- Paasiniaanerup ingerlaqqinneranut atatillugu umiarsuarmi misissueqqissinnaanerput mattussinnaanngilarput, pigaartut pisortaat oqarpoq.

Politiit naapertorlugit paasiniaaneq pasisaqarnissamut tigusarinninnissamulluunniit maannamut tunngavissiisimanngilaq.

Suleqatigiinneq nersualaaraa

Pigaartut pisortaata suleqatigiinneq aamma nersualaarpaa:

- Politiit tungaannit umiarsuarmit takornariartaammit oqartussanillu pisumut akuutinneqarsimasunik suleqatiginnilluartoqarneranik misigisaqarpugut, taanna oqarpoq.

Ocean Explorer suli sumiiffimmiippoq maannalu ikkarlinnerup kingorna ajoqusernernut isumannaallisaanermullu atatillugu misissorneqaleruttorluni, Kalaallit Nunaanni Politiit allapput.

Umiarsuaq inunnik 206-inik issimasoqarpoq. Pinngortitaleriffiup umiarsuaa Tarajoq Ocean Explorerimik nusullugu kaanngartitsisuuvoq.