Høegh-Dam pillugu suliaq eqqartuussivimmi ullumi aalajangiiffigineqassaaq
Avannaata Kommuniani kommunalbestyrelsemi ilaasortaq Minik Høegh-Dam pillugu suliaq Nunatta Eqqartuussiviani ullumi aalajangiiffigineqassaaq. Pineqartoq ikiaroornartoq pillugu inatsimmik unioqqutitsisimasutut siullermik eqqartuunneqarami pinngitsuutinneqarsimavoq.
Minik Høegh-Dam ullumi eqqartuussaasussanngorpoq. Ikiaroornartoq pillugu inatsimmik unioqqutitsisimasutut eqqartuunneqarnera, Nunatta Eqqartuussiviani maanna naammassillugu suliarineqartussanngorpoq.
Eqqartuussivik ilisimatitsivoq suliaq Ilulissat eqqartuussiviani, ullumi tallimanngornermi 26. maj ingerlanneqassasoq.
Minik Høegh-Dam ikiaroornartoq pillugu inatsimmik unioqqutitsisimasutut Sermersuup Eqqartuussiviani 25. marts 2021 eqqartuunneqareerpoq. Eqqartuunneqaqqaarami pinngitsuutinneqarpoq, unnerluussisussaatitaasulli suliaq Nunatta Eqqartuussiviani suliassanngortissallugu piumasarisimavaa.
Minik Høegh-Dam Facebookimini allappoq suliap naammassinissaa qilanaaralugu:
- Ukiut marluk qaangiummata kiisami naammassisussanngorpoq. Pinngitsuutinneqarnissara qularinngilara, ilaatigut allappoq.
Isarussat puuini 150.000 koruunit sinnerlugit
Unnerluussut naapertorlugu Minik Høegh-Damip angerlarsimaffiani politiit 2018-imi ujaasinerminni aningaasanik 154.805 koruuninik nassaarput. Taakkunannga 151.900 koruunit isarussat puuannut imullugit toqqorneqarsimasut nassaarineqarlutik. Aningaasat ikiaroornartumik tuniniaanermit pissarsiaassangatinneqarput.
Minik Høegh-Dam suliaq pissutigalugu Siumumit aprilimi 2021-mi ilaasortaajunnaartinneqarpoq, kommuninut qinersinerup kinguninngua. Qinersereernermi Avannaata Kommuniani borgmesteritut piukkunneqarsimagaluarpoq, tapersiisulli tapersersuinertik aamma tunuartippaat. Minik Høegh-Dam attaviitsutut kommunalbestyrelsemi maanna ilaasortaavoq.
