Innaarsunni qulimiguulimmut mittarfik matugallarneqarpoq
Innaarsunni qulimiguulimmut mittarfiup eqqaani eqqakkat annertuallaalermata qulimiguullit nunaqarfimmut missinnaajunnaarallarput. Illuniit eqqagassat peerneqareerpata aatsaat helistoppi ammaqqissaaq.
Mittarfeqarfiit allatut ajornartumik Innaarsuit helistoppia matugallartariaqalerpaa. Sumiiffimmi illuniit eqqagassat katersuussimasut annertuallaalernerat pissutaalluni qulimiguullit sumiiffimmi angallassinnaajunnaarput.
Mittarfeqarfiit tusagassiorfinnut taama nalunaaruteqarput.
Helistoppi ammaqqinneqassaaq illuniit eqqagassat tingittoorsinnaasut peerneqareerpata, Mittarfeqarfiit allappoq.
- Ajoraluartumik Innaarsunni eqqaavissuaq qulimiguulinnut mittarfimmit 50-meterit inorlugit qanitsigisumut inissinneqarsimavoq. Taamaammat soorlu puussiat plastikkit eqqakkallu allat silaannarmut qangattaanneqarlutik qulimiguullip qulani aquanilu kaavittuinit millugunneqarsinnaammata, tamanna timmisartuussinermi isumannaallisaanermut annertuumik ajornartorsiortitsivoq. Tamannalu ajunaarnermik kinguneqanngitsoorsinnaanngilaq, Mittarfeqarfinni ingerlatsinermi pisortaq Niels Grosen
nassuiaavoq nangillunilu:
- Maanna pissutsit, assinit uppernarsaatitut pissarsiareqqammikkatsinnit marsip ulluisa 30-ianneersunit, ajoraluartumik suli ajornerupput, oqarpoq.
Ullut pingasut qaangiuppata ammaqqissangatinneqarpoq
Mittarfeqarfiit Avannaata Kommunia pissutsit pillugit ilisimatippaat eqqagassallu isumageqqullugit Innaarsunni mittarfik ammaqqinniassammat. Mittarfeqarfiit ilisimatitsipput helistoppi marlunngornermi 25. april ammaqqinnissaa naatsorsuutigalugu.
- Pilersaarutit malillugit qulimiguulimmik Innaarsunnukartoqaqqissaaq sisamanngornermi aprilip 27-iani. Ulloq taanna sioqqullugu aaqqiissoqassappat matusineq timmisartuussisarnermut sunniuteqassanngilaq, Mittarfeqarfiit ilisimatitsipput.