Oqaluttuarisaanermi aasanerani nalunaaquttap ingerlaarfianut siuartitsineq kingulleq
Nalunaaquttat unnugu akunnermik ataatsimik siuartereerpata inatsit nutaaq atuutilerluni Kalaallit Nunaat nalunaaqutaqatigiissummut nutaamut ilanngutissaaq.
Arfininngornerup unnukkuani nalunaaqutaq qulinut akunnermik ataatsimik siuartissaaq, ukioq mannalu allaanerussutigaa nalunaaqutaq oktobarimi akunnermik ataatsimik kinguarteqqinneqassanngimmat.
'Nalunaaquttap ingerlaarfianut' susassaqarfik Namminersorlutik Oqartussat akisussaaffigilernikuuaat, Kalaallit Nunaannilu nalunaaquttap ingerlaarfiata aaqqinneqartarnera Inatsisartut allanngortinneqassasoq ukiarmi aalajangiiffigaat.
Naalakkersuisut Siulittaasuat Múte B. Egedep (IA) ulloq oqaluttuarisaanitsinni pingaaruteqartutut taavaa:
- Oqaluttuarisaanitsinnut ulloq pingaartuuvoq. Nunatsinni nalunaaquttap ingerlaarfia nalinginnaasumik allanngortitsineq ukioq manna oktobarip qaammataata naanerani aatsaat malunnaateqassaaq, tassa akunnermik ataatsimik nikisitsisarfigisimasatsinni. Ukioq mannali taamaasiussanngilagut, Múte Bourup Egede taama oqarpoq.
Ittoqqortoormiit nalunaaquttap ingerlaarfia nalinginnaasoq malitartik aallutiinnassavaat, tassani akunnernik marlunnik Kalaallit Nunaata sinneranit siulliussasut Nalaakkersuisut naqissuserpaat.
Ullaaq tarrajunnerusoq
Naalakkersuisut suliamut tusarniaanertik aallartimmat Ittoqqortoormiini innuttaasut allanngueqataarusunnersut imaluunniit maanna malitartik attatiinnarniarusunneraaq paasiniarpaat.
Nalunaaquttap ingerlanerani nalunaaqutaqatigiissummut nutaamut UTC-2-mut tassa maanna ilannguppoq.
Nalunaaquttap aalajangersarneqarneranut allanngortitsineq isumaqarpoq, Kalaallit Nunaat akunnermik ataatsimik Europap Danmarkillu nalunaaqutaannut nikingalissasoq. Tassalu aamma akunnermik ataatsimik Nordamerikamit sivisunerusumik ungasinnerulissasoq, tassalu sumiiffinni taakkunani nikanganeq akunnernik pingasuulissallutik.
Ukiaruli aatsaat Danmarkimi nalunaaqutaq akunnermik ataatsimik kinguartinneqarpat nunatsinni nalunaaqutaq nikisinneqarani atuutilissaaq.
Nalunaaquttap aalajangersarneqarnera sunniuppat ullaakkut tarrajunnerusalerluni ualikkut unnukkullu sivisunermik qaamanerusalissaaq.