Ilulissat Kangia: Isumaqatigiissuteqarnerup kingorna UNESCO-p kingornussassaanut ilaaginnassaaq
Maanna inissippoq: Ilulissat Kangia UNESCO-p nunarsuarmioqatigiinnut kingornussassaannut allattorsimaffimmut ilaaginnassaaq. Kommunalbestyrelsip isumaqatigiissuteqarneq tunuliaqutigalugu tamanna aalajangerpaa.
Ilulissat Kangia UNESCO-p nunarsuarmioqatigiinnut kingornussassaannut allattorsimaffiannit peerneqassanngilaq, Anthon Frederiksenip (N) tamanna siunnersuutigigaluarpaa. Illuanik Avannaata Kommuniata nunap killigititap nalilersoqqinniarpaa, taamaalilluni illoqarfiup kujataatungaani sanaartornissamut ammaasoqarniassammat.
Aqutsisoqarfiup inassuteqaataanik kommunalbestyrelsip akuerinninnerata kingorna tamanna paasinarsivoq, tassani nunami killigititami sanaartortoqarnissaanik pilersaarusiornissamik aallartitsisoqarnissaanik imaqarpoq.
Toqqaviit aamma atuisunut akiliisitsisarneq
Nunami killigititami kommunip suliassaqarfigisaani sanaartortoqarsinnaanissaa siunertaavoq, peqatigisaanillu UNESCO-mi malittarisassat ataqqinneqarnissaat.
Sumiiffinni Qaannguata Qaava, Qilakittup Alanngua, pilersaarummik suliaqartoqassasoq aalajangerneqarpoq. Aammattaaq ilisimasaqarnerulernissaq aamma unammilligassanik nalunaarsuinissaq siunertaralugit innuttaasunik ataatsimiisitsisoqassasoq, kommunalbestyrelsip akueraa. Kommunalbestyrelsip aamma sanaartorfiit toqqaviinut atuisunut akiliisitsisarnissaq ilaatigut aqqutissiorpaa.
