Qimussit: Ullut qulingiluat ingerlaneranni 1605 kilometerisut isorartutingisumut qimussertoq
Qimussernermik misilittagaqarluartoq Ryan Redington Nomemi marlunngormat apuuffissamut apuuppoq, taamaasillunilu qimusserluni unamminermi takinerpaami ilungersunarnerpaamilu ajugaalluni.
Ullut arfineq-pingasut, akunnerit 21-t, minutsit aqqaneq-marluk sekundillu 58-it.
Qimussertartoq Ryan Redington arfinilinnik qimmeqarluni Alaskami Anchoragemiit Nomemut piffissaq taama sivisutingisoq atorpaa - taamaasillunilu unamminermi Iditarod-imi ajugaalluni.
Ingerlavigisaq 1605 kilometerisut isorartussuseqarpoq.
High North News naapertorlugu Ryan Redingtonip aataavata unammersuarneq ukiut 50-it matuma siorna pilersissimavaa.
Aningaasartaqangaatsiartoq
Ryan Redington 15-issaat peqataavoq, aatsaavissuarlu ajugaalluni. Qimusserluni unammersuarnermi ilaquttamini siullersaalluni ajugaavoq, naak ilaqutariit ukiuni qulikkaani arlalinni peqataatitaqartuaannaraluartut.
- Ajugaanermut uppernarsaat angerlaatissallugu isumalerujussuuvoq. Meeraallungali Itidarodimi ajugaanissara anguniassallugu aalajangersimavunga, ajugaaneralu upperiuminaatseqaara. Anguniagaq tikitserlugu pisariusimaqaaq utaqqisinnaassuseqarnermillu pisariaqartitsisimalluni, Redington Anchorage Daily Newsimut oqarpoq.
Redington ajugaanermini aningaasartassat 500.000 dollarsit agguaanneqarnerani amerlanerpaartai pissavai. Unammisut Nomemut apuuttut apeqqutaallutik aningaasartassat agguarneqassapput.
