Kommunit ilungersortut: Angajoqqaarsianik arlalinnik amigaateqartut
Kommunit angajoqqaarsianik amigaateqarput. Kommuninut paasiniaarit takutippaat kommunit marluk katillugit angajoqqaarsianik 60-inik amigaateqartut.
Angajoqqaarsiat nunatsinni amigaataapput.
Kommuneqarfik Sermersuumi angajoqqaarsiat katillugit 50-t amigaatigineqarput.
Avannaata Kommunia ilisimatitsivoq kommuni angajoqqaarsianik qulit missaannik amigaateqartoq, maannakkorpiarlu angajoqqaarsiat professionelleusunik kommuni atorfeqartitsinngitsoq.
Kommune Kujallermi 80-t missaannik angajoqqaarsiaqarpoq. Kommunip qassinik amigaateqarnini oqaatigisinnaanngilaa, amigaateqartoqartorli ilisimatitsissutigalugu.
Qeqqata Kommunia aamma Kommune Qeqertalik Sermitsiaq.AG-p paasiniaaneranut akissummik tunniussaqanngillat. Qeqqata Kommuniali 2020-mi ilisimatitsisimavoq angajoqqaarsiat qulit missaat taamani amigaatigalugit.
Sullissineq sivisusinnaasartoq
Kommuni angajoqqaarsianngorusuttuniit qinnuteqaatinik tigusigaangami, qinnuteqaatip suliarinissaa nalilersornissaalu sivisusinnaasartoq, Isumaginninnermut Aqutsisoqarfimmi sullissisunut siunnersuisarfimmi ilaqutariinnik siunnersuisartunut siunnersorti Mia Nielsen Sermitsiaq.AG-mut ilisimatitsivoq.
- Qinnuteqaatinik suliaqarneq ataatsimut isigalugu sapaatit akunnerpaalunnik sivisussuseqarsinnaavoq. Qinnuteqartoq pillugu oqartussani assigiinngitsuni paasissutissaatigineqartut aaniarneqaqqaartarput, qinnuteqartoq nalilersulinnginnernai, Mia Nielsen Sermitsiaq.AG-mut ilisimatitsivoq.
Innuttaasoq angajoqqaarsianngorusulluni qinnuteqarpat akileraartarnermut aqutsisoqarfimmut paasissutissanik, isertitat akiitsullu pillugit paasissutissanik, peqqinnissaqarfimmullu peqqissuseq atuisuunnginnerlu pillugu paasissutissanik kommuni aallertariaqartarpoq. Qinnuteqartoq aamma pinerluuteqannginnermut meeqqanillu kinguaassiutitigut atornerluisimannginnermut uppernarsaateqartussaavoq.
Suna tamarmi naammassisimassaaq
- Meeqqat inissinneqartussaatillugit, inissiffissaat pitsaanerpaasariaqarpoq, kommunit ilisimasussaavaat meeraq sumut inissilernerlugu, taamaattumik suna tamarmi misissorneqartarpoq. Meeraq sumi najugaqassanersoq takuniarlugu aamma alakkaasoqartarpoq. Angajoqqaarsiani imigassamik aanngajaarniutinilluunniit atuisoqassanngilaq, angajoqqaarsianngortullu atugaat ajunngitsuusariaqarput, ilaqutariinnut siunnersuisartunut siunnersorti oqarpoq.
Isumaginninnermut aqutsisoqarfimmi ilaqutariinnut siunnersuisartunut siunnersortip oqaatigaa qinnuteqarnermit angajoqqaarsiaasinnaanermut akuerineqarnissap tungaanut piffissaq sivisungaatsiarsinnaasoq, paasissutissami kommunip nalilersugassai ilai killilimmik aamma piffissalerneqarsimasarput.
- Assersuutigalugu nakorsamit uppernarsaat qaammatit pingasut qaangiussimappata pissarsiarineqarniaqqittariaqarpoq. Paasissutissat ilaat sivisunerusumik aaniarneqarpata, paasissutissat allat qaangiuttoorsimasut nutaamik aaniarneqartariaqartarput, Mia Nielsen oqaluttuarpoq.
Naalakkersuisut ilaqutariinni pitsaaliuinermik suliaqarnermut iliuusissatut pilersaarutaanni anguniarneqarpoq meeqqat angerlarsimaffiup avataanut inissinneqartartut 2030-mi ullumikkumiit ikinnerulissasut. Angajoqqaarsiat amerlanerulernissaat pillugu meeqqanut, inuusuttunut ilaqutariinnullu Naalakkersuisoq Mimi Karlsen (IA) ilisimatitsisimavoq kommunit suleqatigineqassasut.