Naalakkersuisut: Kalaallit inuiaat arlalinngorlugit immikkoortiterneqarsinnaanngillat
Tunumiut nunap inoqqaavisut immikkuullarissuunersut pillugit apeqqut eqqartuussivitsigut tunniunneqarsinnaasoq, Naalakkersuisut isumaqarput. Tamatumali ilumoornerarneqarnissaa Naalakkersuisut qularutigeqaat. Suleqatigiissitat kommunit avinneqarnissaat pillugu apeqqut nalilissavaat.
Ilisimatusarfimmi ilisimatusartup tunumiut Kalaallit Nunaata sinneranit naqisimaneqarlutillu ajattorneqartutut misigisimasartut, misissuinerata takutitsineranik oqaaseqarnera uissuummititsillunilu oqallisaavoq.
Taamatut oqariartuuteqartoqarnerata kingorna, tunumiut nunap inoqqaavisut immikkuullarissutut illersorneqarsinnaanersut, Lars Poulsenip (S) Naalakkersuisut akissuteqarnissaannik qinnuiginnippoq.
Tunumiut ILO pillugu isumaqatigiissummi nr. 169-imi aalajangersakkatigut nunap inoqqaavisut kiisalu naggueqatigiittut illersugaareersut, Naalakkersuisut oqaatigaat, tassami aalajangersakkat taakku Kalaallit Nunaanni nunap inoqqaavinut tamanut atuummat.
Naalakkersuisut Danmarkip 1996-imi nalunaarutaanut innersuussivoq, tassani Danmarkimi nunap inoqqaavi ataasiinnaasut allassimavoq – tassa inuit:
Tunngaviusumik eqqartuussivinnut tunniunneqarsinnaasoq
- Nalunaarut Naalakkersuisunit isumaqatigineqarpoq. Nunarujussuatsinni sumiiffinni assigiinngissutivut apeqqutaatinnagit, soorlu sumiorpaluutivut, inuuniarnitsinni pinngortitami atugassarititaasut, inuussutissarsiutit angallannermilu pissutsit eqqarsaatigalugit.
- Taamaammat inuiaat kalaallit inuiannut nunalluunniit inoqqaavinut immikkuullarissunut pingasunut amerlanerusutulluunniit agguataarneqarsinnaasutut Naalakkersuisunit isigineqanngillat, ilinniartitaanermut, kultureqarnermut, timersornermut ilageeqarnermullu naalakkersuisoq, Peter Olsen (IA), Lars Poulsenimut taama allappoq.
Naalakkersuisut paasinninnerat naapertorlugu nunap inoqqaavisut immikkuullarissutut akuerineqarumalluni piumasaqaat eqqartuussivinnut tunniunneqarsinnaalluarpoq, Naalakkersuisut nangillutik allapput.
- Piumasalli taama ittup ilumut ilumoornerarneqarnissaa Naalakkersuisunit qularutigineqaqaaq, naalakkersuisoq taama naliliivoq.
Eqqartuussiviit qullersaannit eqqartuussummut aamma ILO-mit aalajangiinermut naalakkersuisoq innersuussivoq, tassani inughuit Kalaallit Nunaata avannaaniittut kalaallinit allanit immikkoortinneqarsinnaanngitsut aalajangiunneqarpoq.
Tunumiummi sumiorpaluutaat?
Ilisimatusartup Ulunnguaq Markussenip, tunumiut naqisimaneqarnerannik naliliineranut tunngatillugu, inuiaqatigiit tamarmik, sumi najugaqarneq apeqqutaatinnagu naligiinnissaat Naalakkersuisut sulissutigigaat, naalakkersuisoq akissuteqarpoq.
Tunumiut oqaasii aamma qitiusumik inissisimapput, kitaamiut oqaasiinut sanilliullutik allaanerugamik. Tassungalu atatillugu tunumiut oqaasiisa 'sumiorpaluutaannartut' inissisimanatit pisortatigoortumik oqaasinngortinneqassappata sumik piumasaqaatitaqarnersoq, Lars Poulsenip paaserusuppaa.
Tunumi sumiorpaluut pisortatigoornerulersinneqassappat, sumiorpaluutitullu taagorneqarunnaassappat immikkullu oqaatsitut inissinneqassappat, ilisimasalinnit naliliinermik pisariaqartitsisoq, Peter Olsen tassani nalunaaruteqarpoq. Allannguisoqassappat misissoqqissaarneqartariaqarpoq, ilaatigut inatsisartut inatsisaat tamarmik sunniuteqarfigineqartussaammata, taama oqarpoq.
Suleqatigiissitat kommunit avinneqarnissaat nalilissavaat
Tunu immikkut nammineq kommuneqartariaqarnersoq, apeqqutit annertuut ilagaat. Lars Poulsenip tamatuma misissorneqarnissaa piumasaraa.
Suleqatigiissitallu tamanna misissussagaa, naalakkersuisup oqaatigaa:
- Politikkikkut aqutsisut Naalakkersuinikkut Ataqatigiissaarisut februar 2023-mi ataatsimiinneranni Naalakkersuisut nunatsinnilu borgmesterit tamarmik isumaqatigiissutigaat kommunit agguataarneqarnerannik misissuisussamik suleqatigiissitaliortoqassasoq, Peter Olsen allappoq.