Politikkikkut parti nutaaq: Nalaagaaffinngornissaq anguniagaavoq
Kommunini nunatsinnilu politikkimik suliaqarnermik misilittagaqartoq, Henrik Fleischer, allanik suleqateqarluni partiimik nutaamik pilersitsiniarpoq, anguniarlugu nunatta naalagaaffinngornissaa. Alloriarneq tulliussaaq immikkoortortanik pilersitsiortornissaq.
Naalakkersuinikkut suliaqartuni suliniaqatigiiffik nutaaq saqqummerpoq.
Kalaallit Nunaata namminiilivinnissaa anguniagaavoq. Nunarput naalagaaffinngornissaa anguniarlugu imartatta killeqarfiillu akisussaaffigilernissaat, aalisarnikkullu nunanut allanut toqqaannartumik niueqateqalernissaq, kiisalu allaffissornikkut pisortanilu oqaatsit kalaallisut kisiisa atorneqalernissaat aallarniutaassapput.
Siumumi Naleqqamilu ilaasortaasimasoq, Henrik Fleischer, partiimi suliniaqatigiiffimmi siuttuuvoq.
- Tamassuminnga suliniarnermik kisimiinngilanga. Arlariiuvugut naalakkersuinikkut suliniaqatigiiffimmik aallartitsisut. Maanna avammut nalunaaruteqarpugut, tulliussaarlu immikkoortortanik arlalinnik pilersitsinissaq, taakku tunngavii malitassat aamma inissititereerput. Nunatta namminiilivinnissaanut sulinerup pimoorutilernissaa piffissanngorpoq, Henrik Fleischer Sermitsiaq.AG-mut oqaluttuarpoq.
Anguniakkat qulit saqqummiunneqartut
Kommuninut Inatsisartunullu qinersinissamut amerlanerpaamik suli ukiut marluupput. Henrik Fleischerip erseqqissarpaa politikkikkut sulineq torersumik aallartinneqareersoq, qinersinissarlu utaqqinagu sulisoqartoq. Partii nutaaq Qulleq-mik ateqarpoq. Tassa qanga kalaallit qulliat, nerisaqartitsisoq, qaammaqqusiisoq kialaartitsisorlu, tamanik katersuutitsisoq.
- Qinersinissat tungaannut suliagut ingerlatissavagut. Namminiilivinnissamut anguniagarput pimoorullugu ingerlatissavarput, takorluugarput piviusunngortinnissaa upperilluinnarparput uniinnarniarnatalu, Henrik Fleischer oqarpoq.
Qulleq qulinik siullertut anguniagaqarpoq:
- Kalaallit Nunaat naalagaaffinngussaaq, tunngaviusumik inatsiseqartoq
- Kommunerujussuit nunatsinnut naleqqussarneqassapput, KANUKOKA-lu pilersinneqaqqilluni
- Inuiaqatigiit naqisimaneqaratik, kiffaanngissuseqartut politikkikkut aningaasaqarnikkullu nammineertut
- Pisuussutit uumassusillit uumaatsullu paarineqarlutik iluanaarutaallutilli atorneqarnissaat
- Aalisakkanik tunisassiornermi niuernermilu iluanaarut annerpaaq nunatsinnut tuttassaaq
- Kalaallisut oqaatsivut Inatsisartuni pisortallu sullissiviini atorneqassapput
- Inuiaqatigiit isumaginnilluartut, atugarissaarnikkut aningaasarsiornikkullu naligiinneruneq
- Ilinniarsimassuseq nunamut naleqqussarsimasoq
- Inuit oqartussaaqataanerat ataqqineqassaaq
- Naalagaaffiit Peqatigiit aalajangersagaat nunatsinni aamma malinneqassapput
Qanoq aningaasalersorneqassava?
Nunatta naalagaaffinngornissaa pillugu oqallittoqartillugu, qanoq aningaasalerneqassanersoq apeqquserneqartuaannarpoq.
Henrik Flesicher arlalinnik siunnersuutissaqareerpoq aningaasalersuinissamut tunngatillugu:
- Siullermik imartatta akisussaaffigineqarnera uagut tigusariaqarparput, tamanna piaarnerpaamik pissaaq. Aalisarnikkut niuernermi iluanaarut annerpaaq piniarlugu avammut niuerneq toqqaannarnerulersissavarput, oqarpoq.
Taassuma ilanngullugu erseqqissarpaa anguniakkat suliarinerani Qulleq Savalimmiut qanoq iliornerannut qissimissimasoq.
- Savalimmiut qanoq suleriuseqarnerat qiviaannarsinnaavarput. Taakku aalisarnikkut, niueqateqarnikkut allaffissornikkullu uagutsinniit allaanerusumik ingerlapput, uagutsinniillu aningaasaqarnikkut ingerlalluarnerullutik. Allaffissornermi oqaatsit marluk atunngilaat, uagut oqaatsit marluk ingerlallugit marloqiusamik sulisugut. Nunatsinni pisortani sullissivinnilu oqaatsigut kisiisa atulerutsigit aamma tassuuna sipaarutissartaqarpoq, Henrik Fleischer oqarpoq.
Akisussaaffiit Danmarkimiit tiguneqarnerani nunarput nammineerluni akiliisussaavoq. Assersuutigalugu politeeqarneq eqqartuussiveqarnerlu nunatta akisussaaffigileraluarpagit, akiligassaq 100 milliuunilikkaanik koruuninik ukiumut naleqartoq, nunatta akilertalissavaa. Naalagaaffimmit tapit 4 milliardit koruunit tungaannoortut nunatta naalagaaffinngoruni aamma allatut aningaasassaqartinniartariaqalissavai. Naalagaaffimmit tapit nunatta karsiani ukiumut kaaviiaartinneqartut affaasa missaraat.
Qulleq pilersinniarlugu suliniaqatigiit november 2022-mi aallartissimapput.
Siulersuisuugallartut ukuupput:
Henrik Fleischer Sisimiuniit, siulittaasoq
Karl Ingemann Maniitsumiit, siulittaasup tullia
Erik Lange Ilulissaniit, siulittaasup tulliata aappaa
Nuka John Olsen Qaqortumiit
Aqqa Inuk Lange Nuummiit
Qulleq Narsami aamma ilaasortaatitaqareerpoq, illoqarfinnilu allani ilaasortaqalernissaq maanna sulissutigineqarluni.