- Ajoqusertup kajumissutsimillu suliaqartut misigisaat nuanninngitsoq allanngortissinnaanngilara, kisianni politiit iliuuseqarnerannut tunuliaqutaasoq nassuiarniarsarissavara.

Kalaallit Nunaanni Politiit pisortaat, Bjørn Tegner Bay, taama oqarpoq.

Sapaatiummat angut qaqqami Nuup kangiani qamuteralalluni ajutooreernerata kingorna, taanna taamatut oqaaseqarpoq.

Erik Palo qaqqami najuuttoq, tamatuma kingorna oqartussat iliuuseqarnerannik isornartorsiuivoq, ikiuiartortussat ajutoorfimmut takkutinngimmata.

- Pisoq nuanninngilluinnarpoq. Oqartussat tungaannit ersarissumik nalunaaruteqartoqanngilaq, taanna Sermitsiaq.AG-mut oqarpoq.

Innuttaasut ajornartorsiutissarinngisaat

Innuttaasumut ajutoortumut ikiorneqartariaqartumut ikiortissat oqartussat marluk arlallilluunniit suleqatigiinnerannit kinguarsarneqartarnera naleqqutinngitsoq, politiit pisortaata oqaatigaa – kinguaattoornermut pissutaasoq apeqqutaatinnagu. Innuttaasup tamanna ajornartorsiutigisussaanngilaa.

- Pisumi tassani qamuteralannik ingerlatsisoq ajoqusersimasoq – pisoq eqqarsaatigalugu – kajumissutsimik suliaqartunik pikkorissunik suliaminnillu ilisimannittunik eqqaaniittoqarneratigut iluatsitsivoq, taakku iliuuseqarlutik akisussaaffimmik tigusipput. Kisianni tamatigut taama iluatsitsiginissaq naatsorsuutigineqarsinnaanngilaq, Bjørn Tegner Bay allappoq.

Taanna ilisimatitsivoq:

Kalaallit Nunaanni Politiit ajutoorneq pillugu nalunaaqutaq 16 sioqqutilaaraa nalunaarfigineqarput. Politiit nalunaaruteqartumit pitsaasunik tamakkiisunillu paasissutissanik pissarsipput, taanna oqarasuaatini attavinitsinniarlugu Isikkiviliarsimavoq.

Peqqissutsimik sulialimmit naliliineq

Nalunaaruteqartup ilaatigut ajutoornerup minutsit 30-t missaasa matuma siornatigut pisimasoq ilisimatitsissutigaa, taamatullu aamma ajoqusertup qanoq inneranik paasititsilluni, sukku ajoqusersimasinnaanersoq, aamma sumi ajutoorsimanersoq.

Qamutit SAR Groupimit kajumissutsimik suliaqartumit kinguninngua attaveqarfigineqarpugut, taassuma ilaatigut ajutoorfiusumukarnini nalunaarutigaa. Aammattaaq peqqissaasoq sumiiffimmut ingerlaniartoq ilisimatitsissutigaa. Politiit ingerlaqataassanngitsut nalunaarutigaarput, Bjørn Tegner Bay allappoq:

- Pisoq taanna nakorsiartumik angallassinerussasoq, peqqinnissaqarfiullu akisussaaffigissagaa nalileratsigu taama aalajangiisoqarpoq. Tassungalu atatillugu ilaatigut Erik Palop isumaliutigisaani isumaliorpugut, tassa ajoqusersimasup eqqunngitsumik nuunneqarnissaanut aarlerinartoqarsinnaasoq, ajoquserneranillu ajornerulersitsisoqarsinnaasoq. Politiillu paasinninnerat naapertorlugu, peqqissaasup naliliinissaanik pisariaqartitsisoqarpoq, Bjørn Tegner Bay oqarpoq.

Aarlerinartoqarnera annikillisikkusukkaat

Kalaallit Nunaanni Politiit peqqissaasumik naliliinerit suut aamma ajutoortoqarneranut atatillugu qanoq iliortoqarsimanersoq ilisimatinneqanngillat, Bjørn Tegner Bay ilisimatitsivoq.

- Politiini peqqinnissaqarfimmut oqaloqatiginnittarnermut ingerlatiinnarusupparput – najugaqarfiunngitsunilu suliniuteqarnermi ilisimasatsinnik tapersiinerit ilanngullugit – taamaaliornikkut pisut assingusut pinaveersaartissinnaagatsigit.