Nakorsaq inuusuttoq: Ikinngummik sianerfissaqartuaannarpoq
37-nik ukiullip Trine Abelsenip – kalaallit nakorsat allat illuatungaannik pivoq – Kalaallit Nunaannut angerlassalluni aalajangiuppaa. Suleqatigissaaqaanga, oqarpoq. Napparsimasunut attaveqarneq aamma sulinermut nuannaalersitsivoq. Atorfimmulli atatillugu aalajangerneq oqitsuinnaasimanngilaq
Suleqatit nuannersut, ilaquttat takoriaannaallugit pinngortitarlu kusanartoq – Kalaallit Nunaanni nakorsaalluni iluaqutit taakku pingasuupput, Trine Abelsen oqarpoq.
Taanna Danmarkimi ilinniareerluni nakorsanut Kalaallit Nunaannut angerlaqqinnissamik - sivisuumik eqqarsaatigereerlugu – toqqaaasunut ilaavoq.
- Atorfimmut atatillugu ilungersunartorsiornikuuvunga nakorsatullu immikkut paasisimasalittut ilinniareernerma kingorna Kalaallit Nunaannut angerlassanerlunga sivisuumik eqqarsaatersuutiginikuullugu. Kalaallit Nunaanni nakorsatut suliffiusinnaasoq ataasiinnaavoq, tassalu nalinginnaasumik nakorsaaneq. Danmarkimi allanik periarfissarpassuaqarpoq, immikkut paasisimasat katillugit 39-t.
- Suliffimmi pissutsit peqqutigalugit Kalaallit Nunaat toqqarsimanavianngikkaluarpara. Immikkut paasisat arlallit eqqarsaatersuutigaakka, soorlu sinitsitsisartoq, pinasuartumik katsorsaaneq, pilattaanani katsorsaasartoq. Kisiannili nalinginnaasumik nakorsaaneq toqqarlugu, oqarpoq.
- Nuannaarpunga Nuummiimmat. Suleqatit eqqarsaatigalugit Kalaallit Nunaanni sulineq nuannersuugami. Suleqatigissaaqaanga. Nalornissuteqartilluni ikinngummik sianerfissaqartuaannarpoq, Trine Abelsen oqarpoq.
- Kalaallit Nunaanniinnissannut aalajangerninnut aamma peqqutaaqataapput soorunami sullitat. Nakorsianut attaveqarneq sulinermi nuannaarnermut ilaasorujussuuvoq. Uannut isumaqaqaaq, Trine Abelsen oqarpoq.
Meeqqat sorlaqarfitsik ilisimassavaat
Uia aamma kalaaliuvoq Danmarkimi titartaasartutut ilinniagaqarluni.
Trine Abelsen Aarhus Universitetimi nakorsanngorniarnini naammassigamiuk Kalaallit Nunaanni nakorsatut 2019-imili sulilerpoq.
Nuliariit Kalaallit Nunaannut angerlassallutik isumaqatigiipput – naak aalajangerneq oqitsuinnaanngikkaluartoq.
- Meeqqatta ukiorpassuit Danmarkimeereerlutik sorlaqarfitsik Kalaallit Nunaannilu pingaartitat ilikkassagaat isumaqaratta. Aanaakkut aataakkut ilaquttallu sinneri qanitarinissaat uagutsinnut pingaaruteqarami.
Trine Abelsenip angajoqqaavi, sakikkui, sakiatsiaa, ajaa angaavilu Nuummiipput. Kammalaaterpassuilu qanigisai aamma Nuummiillutik.
- Ataataga qallunaajuvoq, Danmarkimiittumut atsannut qanittumik attaveqarpunga. Sorlaqarfimmi ilaattut isigisannik, Trine Abelsen oqarpoq.
Taamaakkaluartoq ilinniarneq naammassimmat najugaqarfigerusutaanni Kalaallit Nunaat ajugaavoq.
- Pinngortitaq, ilaquttanut ikinngutinullu qanilaarneq immikkuullarissoq Kalaallit Nunaanniinnaq pigisutut misigisarput, nakorsaq 37-nik ukiulik oqarpoq.
AG-mi uani sapaatip akunnerani saqqummertumi paasisaqarnerugit. Uani isissutissarsigit:
