Hashinik nunatsinnukartunik arsaarinnittarnerit amerleriartut
Kangerlussuarmi ilanngaaserisut ataasinngormat arnaq hashimik 1 kiilumik timiminut toqqugaqarsimasoq unitsippaat. Siulianut sanilliullugu ilanngaaserisut amerlanerusunik unitsitsisalerput, politiit pisortaat Bjørn Tegner Bay ilisimatitsivoq.
Kangerlussuarmi ilanngaaserisut arnamik unitsitsipput, taanna Kalaallit Nunaannut tikinnermini hashimik 1 kiilumik toqqugaqarsimavoq. Hashimik tuniniaaqqinnissamik siunertaqarluni anngiortumik eqqussisimasutut maanna unnerluutigineqarpoq, Eqqartuussisoqarfik Sermersumi ullumikkut sassartinneqassaaq. Kalaallit Nunaanni Politiit pigaartuisa pisortaat, Bruno Brix, Sermitsiaq.AG-mut taama ilisimatitsivoq.
Inuit hashimik tigummisut imaluunniit pinerluttut allatut hashimik nunatsinnut anngiortumik eqqusseriartartut pillugit oqaluttuat qaqutigoortuunngillat. Kalaallit Nunaannilu Politiivini pisortap oqarnera naapertorlugu, ilanngaaserisut suliaqarnerannit tamanna pissuteqarpoq.
- Politiini hashi ataavartumik ukkatarisarparput. Kisianni maanna eqqusseriartunik amerlanerusunik unitsitsisalernerput, Kangerlussuarmi ilanngaaserisut tarrarsuilluni assiliivinnik atuinerulernerannik ukkataqarnermik pissuteqarpoq.
Suliat amerlanerusut misissuinermik ukkatarinninnerulersitsisut
Ilanngaaserisut pasisaqanngikkaluarlutik nalinginnaasumik misissuinerminni siumugaqarnerusalernerannik tamanna isumaqarpoq. Pingaartumik inuit hashimik iioraallutik eqqusseriartut timinut assiliivitsigut paasineqartalerput. Ilanngaaserisut nassaaqqikkaangata, politiit hashimik ukkatarinninnerulertarput, sulianik misissuisartussaagamik.
- Inummik hashimik nassataqartumik unnerluutiginninneq ajornanngitsumik pisarpoq, kisianni aamma suminngaanneernersoq, sumut angallanneqarnersoq, kikkullu tunuliaqutaanersut paaserusuttarpavut, Bjørn Tegner Bay oqaluttuarpoq.
Hashi qanoq annertutigisoq ilanngaaserisut politiillu avaqqullugit eqqunneqartarnersoq, pissutissaqarluartumik oqaatigisinnaanngilaa, kisianni hashimik annertuumik arsaarinnittoqartillugu malunnartartoq oqaluttuarpoq.
- Annertuunik nassiussisoqartillugu unitsitsisimatilluta illoqarfinni mikinerusuni imaluunniit nunaqarfinni nunguutsisoqartartoq misigisarparput, suliaqarnitsinnit tuniniarneqartut sunnerneqaraangatalu Nuummi aqqusinermi akigititat qaffattartut.