Saqisut kattuffiat FPU Air Greelandilu Danmarkimi isumaqatigiissitsinairtarfimmi marlunngornermi ullup-qeqqanut isumaqatiginninniarlutik aallartipput.

Isumaqatigiissitsiniartarfimmi sulisut suliumajunnaarsinnaanerat pinngitsoortinniarlugu illuatungeriit isumaqatigiissuteqartinniarneqassapput.

FPU-mit tallimanngornermi nalunaarutigineqarpoq, aaqqiissuteqartoqanngippat sulisut suliumajunnaartussaasut. Suliumajunnaartoqassappat Air Greenlandip timmisartukkut angallassinissat tamaasa unitsinniarpai. Ingerlatseqatigiiffimmit tamanna nalunaarutigineqarnikuuvoq.

Suliumajunnaarnissamik nalunaaruteqarneq Air Greenlandimut annertuumik tatisisimavoq, juullikkunnimi ilaasorpassuaqartarmat.

Bilitsit utertinneqarsinnaasut kinguartinneqarsinnaasulluunniit

Sermitsiaq.AG-mit FPU-meersut pingasunngornermi oqaaseqartinniarsarineqaraluarput, sulisullu kattuffiannit Isumaqatigiissitsiniartarfimmi qanoq ingerlasoqarnersoq oqaatigineqarusunngilaq. Air Greenlandimit aamma taamatut nalunaaruteqarput.

Illuatungeriinnit siusinnerusukkut oqaluttuarineqarpoq, isumaqatigiinngissutaasut ilaatigut ilagigaat, Air Greenlandimit suliffissat eqaannerusumik pilersaarusiorneqartarnissaannik piumasaqartoqarsimanera, tamatumunngalu sanilliullugu sulisut aningaasarsiaasa qaffaaffigineqarnissaannik neqerooruteqarsimallutik. Neqeroorutigineqartulli naammanngilluinnartut, saqisut kattuffiannit nalunaarutigineqarsimalluni.

Tallimanngorpat aallartussaagaanni Air Greenlandimit nalunaarutigineqartut nakkutigineqartariaqarput. Nakkutiginnissinnaanngikkaannili Air Greenlandip bilitsit decembarip aappaaniit 16-iat ilanngullugu atorneqartussatut pisiarineqarsimasut allanngortinneqarsinnaasut nalunaarutigisimavaa.

- Ulluni 2. december - 16. december 2022 aallartussaagaanni bilitsit ullumut allamut nuunneqarsinnaalereerput, Air Greenlandimit nittartakkakkut allapput. Tassani aamma allassimavoq, bilitsit utertinneqarsinnaasut.