Nakorsamut utaqqineq
Peqqinnissaqarfik Inatsisartut ukiaanerani ataatsimiinnerani sammisanut pingaarnernut ilaavoq, inuillu iliuuseqaqqusillutik nillianeri politikkerit oqallinnerminni eqqartorpaat. Mimi Karlsenip peqqinnissaqarfimmi sulisussaaleqineq pillugu partiit ataatsimiigiaqquai.
Peqqinnissaqarfinni nakorsassaaleqisoqarneranit pinartoqartarnera Inatsisartuni paasilluarneqarpoq. Taamaakkaluartoq avinngarusimanerusuni najugallit imminiiginnarneqartutut misiginerannik allannguinngitsoq illuatungiliuttut isumaqarput.
Aviisi AG taama allappoq.
- Sineriammi najugallit amerlasuut nakorsamik utaqqisariaqartarnerit, ilaanni qaammaterpassuarni, pillugu saaffiginnittarput. Taamaammat soorlu assersuutigalugu kræftimik napparsimalersimasut kingusinaarlutik paasinerannik kinguneqarsinnaavoq, Jens Napaattooq peqqinnissaqarfik pillugu oqallinnermi oqarpoq; matumani peqqinnissamut naalakkersuisup Mimi Karlsenip (IA) apeqqarissaarfigineqarneranut.
Napaattooq assersuutigaa avannaani nakorsiat ilaat apriilimili sulunnerlutik akissutisinissaminik utaqqisoq. Mimi Karlsen ajornartorsiut ilumoornerarpaa.
Nalunngilara unammilligassat annertusut, inuppassuarnullu kalluaasut. Nappaatip suussusianik sapinngisamik paasitinneqapallattarnissaq sulissutigaarput. Assersuutigalugu inaluarsuakkut kræfteqalersarnerup misissuiffigineqarnissaanik aallartitsisoqarnikuuvoq. Misissuineq annertusissaaq, oqarpoq.
Mimi Karlsenip ataatsimoorluni peqqinnissaqarfiit pitsanngorsarneqarnissaannut pilersaarusiornissaq siunertaralugu partiit tamaasa aggersarpai:
- Aaqqiissutissat kisimiillunga ujartorsinnaanngilakka. Peqqinnissaqarfik ilungersunartumik inissisimavoq unammilligassarpassuaqarlunilu, aamma nakorsaqarniarnikkut peqqissaasoqarniarnikkullu.
Aviisimi AG-mi atuarnerusinnaavutit. Aviisi uani pissarsiariuk:
