Nunatsinni angerlarsimaffeqanngitsut 491-it.

Tassa innuttaasut 1 procentingajaat.

Nunatsinni angerlarsimaffeqanngitsut siullermeerlugit kisinneqarneranni angerlarsimaffeqanngitsut taama amerlatigisut paasineqarput. Kisitsinerit kommunit Ilisimatusarfillu suleqatigalugit ingerlanneqarsimapput.

Isumaginninnermut naalakkersuisoq, Jess Svane (S), Nuummi Kofoed Skolemi tallimanngornermi ualikkut paasissutissanik nutaanik saqqummiigami ilisimatitsivoq nuna tamakkerlugu kisitsisimanerit tunngavigalugit angerlarsimaffeqanngitsuunerup pinngitsoortinnissaanut Naalakkersuisut tunngavissaqartumik suleriaqqissinnaalertut.

Kilde: Naalakkersuisut

- Nunatsinni angerlarsimaffeqanngitsuuneq nunanut allanut angerlarsimaffeqanngitsuunermut assersuunneqarsinnaanngilaq. Nunatsinni ukiortarpugut, issilertarpugut, kaperlattarpugut. Taamaattumik angerlarsimaffeqanngitsuuneq akiorniarlugu iliuuseqartariaqarpugut, angerlarsimaffeqanngitsut sakkortoorujussuarmik atugaqartarput, isumaginninnermut naalakkersuisoq Jess Svane saqqummiinermini oqarpoq.

Angerlarsimaffeqanngitsuunerup nassuiaataa

Naalakkersuisut Inatsisartunut ilaasortamut paragraf 37 atorlugu 2017-imi akissuteqarnerminni angerlarsimaffeqanngitsut 878-iunissaannut uuttuussimavaat. Kisitsilli taanna qularnartorpassuaqarsimavoq nuna tamakkerlugu tunngavissalimmik misissuisoqarnikuusimanngimmat.

Kilde: Naalakkersuisut

Maannali kisitsisoqareersimalernerani angerlarsimaffeqanngitsuunermut nassuiaatit assigiinngitsut Naalakkersuisunit saqqummiunneqarput. Tassa ersittumik angerlarsimaffeqanngitsut, aamma ersinngitsumik angerlarsimaffeqanngitsuuneq:

Ersittumik angerlarsimaffeqanngitsuuneq:

• Aqqusinermi toqqaannartumik takussaasoq.
• Unnuisarfinni allanilu atuisartoq.
• Silami, toqqini, umiatsiani illunilu atorunnaartuni unnuisartoq.

Ersinngitsumik angerlarsimaffeqanngitsuuneq:

• Utaqqiisaasumik unnuisartoq.
• Najugaqarfissamik nammineq toqqaasinnaanngitsoq.
• Attaveqarfinni sofami sinngumasoq sofamiluunniit atortittartoq.

- Uannut annernarluinnartoq, nassuerutigisariaqagarpulli, tassa angerlarsimaffeqanngitsoqarpoq timitik akiliutigalugit siniffissarsiortariaqartartunik. Angerlarsimaffeqanngitsut ikiorniarlugit suliniartariaqarpugut, Jess Svane oqarpoq.

Angerlarsimaffeqanngitsuunerup nassuiaataasa saniatigut aamma angerlarsimaffeqanngitsunngornissamut aarlerinartorsiortut angerlarsimaffeqanngitsunngoriaannaasullu aamma oqaasertalerneqarput. Taakku kisitsisaatigineqanngillat, isumaginninnikkulli ilungersunartumik inissisimaneri pissutigalugit kommunimut attaveqartooreersut, Jess Svane nassuiaavoq.

First Housing periuseralugu

Nunatsinni angerlarsimaffeqanngitsuunerup qanoq akiorneqarnissaa pillugu aperineqarami Naalakkersuisoq nassuiaavoq Kommuneqarfik Sermersooq siullertut isumaqatigiissuteqarfigineqarsimasoq angerlarsimaffeqanngitsunut inissialiortitsinissaq pillugu. Misissuinerup takutippaa angerlarsimaffeqanngitsut 156-it Nuummiittut, tassa nuna tamakkerlugu angerlarsimaffeqanngitsut pingajorarterutaat.

- Tamassuma malitsigisaanik angerlarsimaffeqanngitsunut aqqutissiuineq siunnersuinerlu aamma ingerlanneqassapput, inuiaqatigiinnut akuulersitseqqinnissaq anguniarlugu. Taama aqqutissiuinissaq kommuni suleqatigalugu ilusilersorneqassaaq, kommunillu ingerlatissavaa, Jess Svane oqarpoq.

Periuseq First Housing, tassa angerlarsimaffeqanngitsut inissiartaarteqqaarlugit inuiaqatigiinni ingerlalluartumik akuulerseqqinniarnissaannut aqqutissiuussisarneq, Finlandimi Danmarkimilu iluatsilluartumik atorneqartareerpoq.

Naalakkersuisoq nassuiaavoq angerlarsimaffeqanngitsuuneq akiorniarlugu suliniutissat kommunit allat aamma peqatigalugit aallartisarneqassasut, kommuninullu oqaloqatigiinnerit maanna aallartereersimasut.