Aasaq manna aatsaat taama siallertigaaq
Aasaanerani siallingaatsiarsimavoq. Qeqertarsuarmi ukiut sisamanut kingullernut sanilliullugu arfineq-marloriaammik annertunerusimavoq. Illoqarfiit marluk ukioq manna ukiunut allanut sanilliullugu qaammatini aalajangersimasuni aatsaat taama siallersimatigipput.
Aasaq manna siallingaatsiarsimavoq.
Qeqertarsuarmi innuttaasut aasaq manna seqineqannginnerunera, nuiallunili siallerajunnerusimanera maluginiarsimavaat. Pingaartumik aasap naajartulernerani.
Illoqarfimmi heliporti taseraannavinngorsimavoq, pisuinnaallu aqqutaat gummeqartigani aqqutissaajunnaavissimallutik.
DMI-p sila pillugu immikkoortortaqarfia ilisimatitsivoq Qeqertarsuarmi nalinginnaasumik silap qanoq ittarneranik naatsorsuinissamut paasissutissat naammanngikkallartut, silasiortut naatsorsuutaat 2018-imiit aatsaat aallartimmata.
Sumiiffimmili siallersimaneranut nittaassimaneranullu paasissutissat ukiukkaarlugit annertungisassaanngikkaluartut, taamaattoq ukiut siuliinut sisamanut sanilliullugu Qeqertarsuarmi ukioq manna siallernerusimasoq DMI-mit ilisimatitsissutigineqarpoq.
Sialuk arfineq-marloriaammik annertunerusoq
Ullumi 22. septemberiuvoq, Qeqertarsuarmilu una qaammat maannamut 171,4 millimeterisut annertutingisumik siallereersimalerpoq. Ukiuni 2018-2021 septemberimi nalinginnaasumik 24,1 millimeterisut annertutingisumik siallertarpoq. Taamaasilluni ukiut siuliinut sanilliullugu ukioq manna septemberimi arfineq-marloriaammik annertunerusumik siallersimavoq. DMI-p sila pillugu immikkoortortaqarfiani ilisimatitsissutigineqarpoq 2018-2021-mi ullut marlussuit sialuk naatsorsorneqarsimanngimmat kisitsisit sanillersuunnissaat mianersuunneqartariaqartoq.
Illoqarfiit marluk aatsaat taama siallertingisut
DMI-p nunatsinni siallerneranut naatsorsuutaani nutaani takuneqarsinnaavoq Nuuk aamma Pituffik junimi augustimilu aatsaat taama siallersimatigisut.
- Kalaallit Nunaata kitaani ukioq manna sialussaqarneruvoq. Nuummi juunimi aatsaat taama siallertigaaq, Pituffimmilu augustimi aatsaat taama sialoqartigaluni, DMI-mi klimatolog, Caroline Drost Jensen Sermitsiaq.AG-mut oqarpoq.
Tamassumunnga pissutaavoq naqitsiniisaffik naqitsinikinnerusoq nunatsinniinnerusimammat, taamaasillunilu nunarput sialussaqarnerullunilu nillernerusimalluni, DMI-mit ilisimatitsissutigineqarpoq.
Nuummi junimi aatsaat taama siallertigisimasoq Caroline Drost Jensen ilisimatitsivoq.
- Nuummi junimi 183,5 mm-isut annertutigisumik siallerpoq. Nuummi 1890-mili sialuup annertussusaa uuttortarneqartalermalli, aatsaat taama qaammammi tassani siallertigaaq. Nuummi junimi nalinginnaasumik 61,7 mm-isut annertutigisumik siallertigisaraluarpoq.
Pituffimmi aamma aatsaat taama siallertigisimavoq.
- Pituffiup sakkutooqarfiani augustimi 155,2 mm-isut annertutigisumik siallersimavoq. Pituffimmi 1961-imiilli maannamut augustimi aatsaat taama siallertigaaq. Qaammammi tassani nalinginnaasumik 26,5 mm-isut annertutigisumik siallertaraluarpoq, klimatolog Caroline Drost Jensen oqarpoq.
