Ilisimatusartartut inuusunnerusut ineriartornissaannut aningaasaliisoqarpoq. 

Nunatsinni Ilisimatusarnermik Siunnersuisoqatigiit, Royal Greenland aamma
Grønlandsbank-ip Inuussutissarsiornermut Aningaasaateqarfia ilisimatusartartut inuusunnerusut ineriartortinniarlugit ilisimatusartartut ilinniarfiannut 11,6 millioner koruuninik aningaasaliisimapput.

Isumaqatigiissutip ph.d.-liortut sisamat postdoc-illu marluk aningaasaliiffiginissaat qulakkeerpaat, aatsaallu aningaasanik taamak annertutigisunik siunnersuisoqatigiit agguaapput.

Ilisimatusarnermillu siunnersuisoqatigiit siullittaasuata Josephine Nymandip tamanna nuannaarutigaa:

- Kalaallit Nunaat maanna siunissamilu pisortani privatinilu ilisimatusartartunik ilisimatusarnermik ingerlatitseqqiisussanik pisariaqartitsivoq. Taamaammat ilisimatusarfigisap tunngavissiilluarnissaa piumasaqaataavoq, aatsaallu inuusuttut ilisimatusartuarnissaat pingaaruteqarpoq, taamaammallu siunissaq ungasinnerusoq eqqarsaatigalugu ilisimatusartartut ilinniarfissaannut ilisimatusartussaqqissullu ineriartornissaanut aningaasaliinissaq pisariaqarpoq.

Aningaasaliineq siunissaq ungasinnerusoq eqqarsaatigalugu

Siunnersuisoqatigiit siulittaasuat malillugu, piffissaq ungasinnerusoq eqqarsaatigalugu
ilimatusarnermut ilisimatusartullu ilinniarfiannut aningaasaliineq ineriartornermut,
nutaaliornermut naleqaleraluttuinnarnermullu tunngavisseeqataassaaq.

Josephine Nymand isumaqarpoq, suliffeqarfiit ilisimasaminnik pilersitsisinnaanissaat, atuisinnaanissaat aningaasarsiorfinngortitsisinnaanissaallu sulisut pikkorissusaat aallaavigalugit pisinnaasartut.

- Inuussutissarsiorfiit pikkorissunik sulisoqarsinnaanerat taamaammat suliffeqarfiit
nutaaliorsinnaanissaannut pingaaruteqaqaaq. Ph.d-ertut postdoc-illu aningaasaliiffiginerinik
nunatsinni inuusuttut pitsaanerpaamik ilinniagaqarsinnaanerannik qulakkeerinneqataavugut, tamannalu nunatsinnut iluaqutaassaaq, Josephine Nymand oqarpoq.

Ilanngutassiaq ilisimatusartut allattorsimaffiata ataani nanginneqarpoq.

Ph.d.-nut aningaasaliivigineqartut sisamaasut taassaapput:

• Ninni Olsen Jeremiassen, dKujataani Ivittuuni aatsitassarsiorfinni eqqakkat aqerlup,
  zinkip flourillu arrorniarneri misissussavai. Ph.d.-liorneq Århus Univesitetimit
  Pinngortitaleriffik suleqatigalugu ingerlanneqassaaq.
• Birthe Eriksen, inuusuttut inersimasullu atornerlugaasimasut ilinniarnermut atatillugu aaqqissuussani aqqusaagaat misissussavai. Ph.d.-liorneq Ilisimatusarfimmi
  ingerlanneqassaaq.
• Sanne Broberg, Kalaallit Nunaanni tarnikkut inooqatigiinnikkullu
  unammillernartuusunik pitsaaliuineq, kalaallit kulturiannik aallaaveqartunik nutaanik
  eqqarsarnikkut periuseqarnikkut peqqissartinnerup ineriartorsinnaaneranut periarfissat misissussavai. Ph.d.-liorneq Ilisimatusarfimmi Roskilde Universitetimilu ingerlanneqassaaq.
• Natacha Leininger Severin, ”Jelly”-fiskit peqqutaannik qaleraliillu pitsaassusaasa
  appariartornerat, kiisalu qalerallit suliarinerisa aningaasarsiornikkullu
  iluaqutigineqarnissaasa pitsaanerulernissaannut teknologikkut aallartisaatit misissussavai. Københavns Universitetimi Ilisimatusarfimmilu, DTU Aqua, Pinngortitaleriffimmi aammalu Royal Greenlandimi Ph.d.-liorneq ingerlanneqassaaq.

Postdoc-inut aningaasaliiffigineqarput:

• Daniel Estévez-Barcia, Kalaallit Nunaanni qalerallit qeqertat akornanniittut
  avataaniittullu genetikkikkut assigiinngissutaat misissussavai. Suliniut Pinngortitaleriffik DTU Aquallu suleqatigiinnerani ingerlanneqassaaq.
• Ninna Karsbæk Senftleber, generikkikkut laktosemik sapigaqarneq misissussavaa
  aammalu sooq kalaallit sukkumik sapigallit inunnut allanut naleqqiullugu inooriaatsimik peqquteqartumik nappaateqalinnginneusartut misissussavai. Suliniut aallartinneqareerpoq Steno Inuunerissaavik Kalaallit Nunaannilu ingerlanneqarluni.

Kalaallit Nunaanni ilisimatusarnermi nukinnik ineriartortitsineq

2022 tassavoq siunnersuisoqatigiit ukiut arfineq aappassaaneerlutik ph.d-nngornianut postdoc- inullu nutaanut inuusuttunullu aningaasaliiffiat.

- Kalaallit Nunaanni ilisimatusarnikkut piginnaasat ineriartorluarput. Ilisimatusarfiup ph.d-
nngorniarfianni ph.d-nngorniat ukiut tallimat ingerlaneranni 18-iniit 35-nut amerleriarsimapput, tamassumalu kalaallit ilisimatusartut piginnaaneqarnerinik uppernarsaavoq. Kalaallit Nunaanni ilisimatusartut inuusunnerit ilisimatusarnermi suliniutillit nutaanngortitsillutillu pitsaanerulersitseqataasut iluatsilluartut nuannaarutaavoq, Josephine Nymand, oqarpoq.