Kalaallit Nunaanni inersimasut akornanni qanoq amerlatigisut amerluuteqarpat? 

Tamanna Herlev aamma Gentoft Hospitalimi nakorsap, Ilisimatusarfimmilu ph.d-ngorniattup, Anna Maria Anderssonip akissutissarsiffigissallugu neriuutigaa. 

Kalaallit Nunaanni amerlunneq pillugu annikitsuinnarmik misissuiffigineqarnikuuvoq. Misissuinerillu inernerisa takutippaat nunat avannarliit sanilliullugit Kalaallit Nunaanni amerluuteqartut amerlanerusut. 

- Kalaallit Nunaanni amerluutit assigiinngitsut pillugit annikitsuinnarmik ilisimasaqartoqarpoq. Una misissuinissaq siunissami suliniutaasinnaasunut tunngaviussaaq, taamaasilluta Kalaallit Nunaanni amerluutit pillugit annertunerusumik ilisimasaqalersinnaasalluta, Anna Maria Andersson Sermitsiaq.AG-imut oqarpoq.

Amerluutit assigiinngitsorpassuit

Tasiilami misissuinissaq maajip sisamaaniit qulingata tungaanut ingerlanneqassaaq, tassanilu peqataasut amianik tigusiffigisassallugit. Atopisk eksemimi taaneqartartoq, sapigaqarluni amerlunneq, psoriasis, acne amerluutillu immikkuullarinnerusut misissuinermi erseqqissarneqassapput. 

- 18-ileereersimasut tamarmik misissuinermi peqataanissaat kaammattuutigaarput. Amerluuteqaraanni amerluuteqanngikkaluaraanniluunniit, tamannami misissuinermi pingaaruteqarpoq, misissuinerullu inerneranut atorneqarsinnaajumaarlutik, Anna Maria Andersson oqarpoq. 

Kalaallit Nunaanni innuttaasut akornanni amerluutit pillugit misissuinerit ikitsunnguupput. Misissuinerup kingulliup takutippaa meeqqat pingajorarterutaat atualinnginnerminni atopisk eksemeqartartut. 

- Meeqqat amerlasuut atopisk eksemeqarnerat takutippaa inersimasut akornanni amerlasuut amerluuteqartuusut. Nunani allani misissuinerit takutippaat meeqqat tallimaagaangata ataaseq amerluuteqartartoq inersimasunngornermini suli amerluuteqartartoq, nakorsaq oqarpoq. 

Amerlasuut amerluuteqartut naatsorsuutigaa

Misissuinerit siulii aallaavigalugit Kalaallit Nunaanni inersimasut akornanni amerluttut amerlassasut naatsorsuutigaa. 

- Suliniut naammassippat naatsorsuutigaara amerlasuut Kalaallit Nunaanni amerluuteqartuunissaat. 

- Neriuutigaaralu misissuinermi Kalaallit Nunaanni amerlunneq pillugu annertunerusumik ukkatarinnilersinnaasalluta. Kisianni aamma paasissutissanik pingaarutilinni pissarsiaqartussaavugut. Sumiiffinni peqqinnissaqarfiit suleqatigalugit amerluut suunera paasisinnaanerulissavagut qanorlu nakorsaasersortoqarsinnaanersoq paasisinnaalissallutigu, taanna oqarpoq. 

Misissuinissami nakorsaq paasissutissiivoq, misissuinermi amerluuteqartut peqataappata amit nakorsaannit qanoq nakorsaasoqarsinnaanerat pillugu pilersaarusiortoqassasoq, peqataasullu journaliani paasissutissat allattorsimatilerneqassasut.

Misissuineq aallartippat illoqarfinni sorlerni misissuiartortoqarumaarnersoq, Anna Maria Anderssonip oqaatigisinnaanngilaa.