Tunillatsissimasut nutaat 457-it
Ullormi kingullermi coronavirusimik tunillatsissimasut nutaat 457-it nassaarineqarsimapput. Inuit tallimat coronavirusi pissutigalugu napparsimmavimmi uninngapput.
Nunatsinni Nakorsaaneqarfimmit ullormut tunillatsissimasut amerlassusaannik nutarterinermi ilisimatitsissutigineqarpoq, ullormi kingullermi coronavirusimik tunillatsissimasut nutaat 457-it nassaarineqarsimasut. Sumiiffinni ukunani tunillatsissimasut ima amerlatigipput:
- Ilulissani 143
- Aasiaanni 2
- Sisimiuni 16
- Kangerlussuarmi 6
- Maniitsumi 6
- Nuummi 283
- Nanortalimmi 1
Nakorsaaneqarfik ilanngullugu allappoq, nunami tamarmi inuit katillutik qulit coronaviruseqarlutik uninngasut, taakkunannga tallimat COVID-19 pissutigalugu uninngallutik, coronaviruseqarlutillu uninngasut sinneri tallimat allanik pissuteqartumik uninngallutik.
Ullormi tunillatsissimasut amerlassusaat marlunngornermut, 524-nik nutaanik tunillatsiffiusimasumut sanilliullutik ikinnerulaarput.
Marlunngornermi coronaviruseqarlutik uninngasut pingasuusimapput, taamalu marlunnik ilasimallutik.